Wekîlanê HDPyî Hîşyar Ozsoyî û Feleknas Uca 26ê çeleyî ra nata Strasbourg de selahîyetdaranê Ewropa reyde pêvînayîşan kenê. Mîyanê 3 rojan de Sekreterê Pêroyî yê Konseya Ewropa û Serekê Meclîsê Parlamenteran ê Konseya Ewropa Bjorn Berge û Meclîsê Parlamenteran ê Konseya Ewropa ra Serekê Koma Lîberale Jacques Maire, Serekê Koma Sosyalîste Frank Schwabe û Serekê Koma Çepe Tiny Kox reyde pêvînayîşî ameyî kerdene. Uca û Ozsoyî selahîyetdaranê Komîteya Vergirewtişê Îşkenceyî ya Konseya Ewropa (CPT) reyde zî pê telefonî qisey kerd.

Hemvervatoxê Komîteya Têkilîyanê Teberî yê HDPyî Hîşyar Ozsoyî derheqê pêvînayîşan de vat: ''Pêvînayîşanê ma de 2 rojdemê serekî estbî; grevê vêşanîye yê tepişteyan ê vera tecrîdkerdişê Birêz Ocalanî û bira Mehkemeya Heqanê Merdiman a Ewropa (MHME) ya seba Demîrtaşî. Tecrîd verê çareserîya meseleya kurdan gêno. Hem CPT hem zî Konseya Ewropa derheqê tecrîdî de 2019 de bira wedaritişî dabi. La Tirkîya na bire nêarde ca. Cara Tirkîya de nîsana 2017î ra nata rewşe vera bena xirabêr. Serekê Parlamento û Serekanê Koman ê Sekreteryaya Pêroyî zî no tesbît kerd.''

Ozsoyî ard ziwan ke Kombîyayîşê Pêroyî yê Meclîsê Parlamenteran ê Konseya Ewropa de bira MHME ya seba Demîrtaşî ameye rojdem. Ozsoyî venga Konseya Ewropa da ke bi hawayêkê cidîyî nêzdîyê na mesele biba û vat: ''Tirkîya rixmo ke endama Konseya Ewropa ya bira înan nêana ca. Ganî Konseye na babete de wayîrê hêzê caardişî biba. Sekreterê Pêroyî yê Konseya Ewropa û Serekê Meclîsê Parlamenteran ê Konseya Ewropa waşt ke menga adare de biranê Demirtaş û Osman Kavalayî bikerê rojdem û Komîteya Wezîran de biercnê.''

Ozsoyî da zanayene ke eke bira MHME nêra caardene beno ke Tirkîya Konseya Ewropa ra bêra vetene.

Çime: YENI OZGUR POLITIKA