Xoverdayîşê grevê vêşanîye Sultan Yîgît û Şiyar Agaogluyî paytextê Awûstûrya Vîyana de mengêk pey de verda. Hemwelatijê ke wazenê paştdayîş bidê Yîgît û Agaogluyî şinê serdana înan. Datîzayê Şiyar Agaogluyî yê bajarê Frankfûrtî yê Almanya yo ke ameyo serdana ey, ard vîrî ke grevê vêşanîye reşto sewîyêka krîtîke.

Xoverdayoxanê grevê vêşanîye ra Şiyar Agaogluyî da zanayene ke rewşa înan a weşîye zêde muhîm nîya, çîyo muhîm wedaritişê tecrîdî yo. Agaogluyî vat, “Vengêko Rayberîye ra bêro, o do bibo wesîlaya haştîye. Ma çalakîya tewr masûmane kenê. Rayapêroyî, çapemenî û rayberê  dinya komkiştişanê dewelata Tirkî yê vera  şarê Kurdan nêvînayîşî ra yenê û vera tecrîdî bêvêng ê. Tewiro winayên nêno qebûlkerdene. Waştişê ma waştişêko merdimî yo.

GREVÊ VÊŞANÎYE KERDO KE DEWLETA TIRKÎ PEY DE GAME BIERZA

Agaogluyî kesê ke ameyê serdana înan, ci rê sipas kerd û ard ziwan ke, verê cû zî temsîlkarê Yewîtîya Hêzan a Demokratîke, Aldar Xelîl û hemwelatijê Awûstûrya ameyê serdana înan. Agaoglûyî ard ziwan ke, kêm bo zî ma bala rayapêroyî ante serê tecrîdî û vat, “Labelê heta nika tecrîd nêşîkîya, na zî seba ma kêmasî ya. Serra 2012 de roja 65’ine de çalakîya grevê vêşanîye de ma tecrîd şikitbî û Rayberîye reyde pêvînayîşê ameyîbî kerdene.

Agaogluyî heme xoverdayoxê grevê vêşanîye silam kerdî û ard ziwan ke dewleta Tirkî kewta tengayîye û va: “Eke kesêk rê çîyêk bibo, dewleta Tirkî do ci ra berpirsîyara ba. Ez pê bawer a ke dewleta Tirkî do apey game bierza, çunke çalakîye her kes şina bena girde. Hepisxaneyan de bi hezar kesî dest bi grevê vêşanîye kerdo ke no zî dewleta Tirkî fîneno tengayîye. No xoverdayîşêko gird o. Tarîxê ma de grevê vêşanîye kerdo ke dewleta Tikrî apey game bierza. Ma zî pê bawer ê ke ma do ser bikewê û tecrîd zî bêro şiknayene.

HÎNA KE KES NÊMERDO, GANÎ HER KES ÇI DEST RA YENO BIKERO

Sultan Yîgîtî zî xoverdayox û kesê ke paştdayîşê înan kenê silam kerdî û ard ziwan, çalakîya înan bi moral dewam kena. Yîgîtî vat, “Mengêk a ma merkezê Ewropa de Vîyana de çalakîya grevê vêşanîye kenê. Ganî dewlete û rayapêroyî bifikirîyê ke ma çira tîya de çalakîye kenê? Eke naye ser o nêfikirîyê û çîyêko xirab biqewimîyo, naye ra ê do berpirsîyar bibê. Çunke 3 serrî yo ma Rayberîye xo ra xebere nêgênê. Ne avûkatî ne zî keyeyê ci nêeşkenê ey bivînê.

CPT yo ke sazgehê Ewropa yo wezîfeyê xo nêano ca. Waştişê ma zî ê yê ke şarê ma û hukmatê Awûstûrya bêveng nêmanê. Ganî sazgehê heqanê merdiman ê Awûstûrya bikewê têgêrayîş. Her çî ra ver, ganî sazgehê heqanê merdiman bêrê goş bidê waştişanê ma ser.  Ma tîya ra veng danê ke êdî wezîfeyanê xo bîyarê ca û vengê ma biheşnê. Eke wina bo, kesêk do nêmireno û tecrîd bero wedaritene. La eke bêvengîye wina dewam bikera û çîyêk biqewimîyayo ê do naye ra berpirsîyar bibê. Çunke ê serê heqanê merdiman de xebatan kenê, labelê merdimanê ke bedenê xo dayo merdişî ver nêvînenê.

Waştişê mi şarê Kurdî ra o yo ke vajê 'Êdî bes o'. Serdanî yenê kerdene, mîtîngî û çalakîyê yenê viraştene, la kêm ê. Ganî çalakîye bêrê xurtkerdene. Tek rojdemê ma ganî grevê vêşanîye û wedaritişê tecrîdî bo. Bi nê rengî ma eşkenê tecrîdkerişê serê Rayberîya xo bişiknê û eke tecrîd bêro şiknayene verê azadîya Kurdistanî zî abeno.  Ganî her kes goreyê nê nêzdîyê babete bo. Hîna ke kesî cuya xo vîndî nêkerda, ganî şar rawerzo payan ser û berpirsyarîya xo bîyaro ca.”