Endama Koordînasyonê PAJKî Aytene Dêrsim û Endama Konseya Rayberdişî ya KJKyî Çîgdeme Dogu Medya Haber TVyî rê qalê têkoşînê sosyalîzmî û cinîyan kerd.

Qiseykerdişê nînan ra çendê qismî wina yê:

Aytene: Şexsê embaze Zîlane de ez embazanê ma Sema, Gulan, Helmet, Raperîn, Bêrîvane û pêro şehîdan yad kena. Ma soz danê ke têkoşînê înan ê seba cuya azade rê dewam bikerê.

Çîgdeme: Kurdîstan de polîtîkayê ‘’bêkurdkerdişî, bêwelatkerdişî’’ yenê caardene. Kurdîstan yeno talankerdene, her ca de awbendî est ê, darî birîyenê. Tena bi qiseyê ‘Ez kurd a la…’ nêbeno. Ganî merdim wayîrê welatê xo vejîyo. Şehîdanê ma vera nê ‘’bêmanakerdişî’’ têkoşîn kerd. Embaze Zîlane, Şêx Seîd û embazanê ey nînan vera polîtîkayanê dişmenî vatibi ‘ney.’ Vera înkar û îmha têkoşîn girîng o. Embaze Zîlane, Gulane, Sema û şehîdanê ma yê bînan verê nê têkoşînî akerd.

Aytene: Partîya ma hişmendîya sosyalîzmê reelî ser o ronîyabî. Têkoşînê sosyalîzmî cuya komunale ra derbaz beno. Cuya sosyalîste wayîra fikrê azadî yo. Mesele afernayîşê hişmendî û rêxistinîye yo. Sosyalîzm heman wextî de rêxistinî ya. Tena fikrêk nîyo. Ganî no fikr bêro rêxistinkerdene. Rayber Apo bi xo tim sey sosyalîstî ciwîya. Ey qetî dewlete ra çîyêk nêpawit û paradîgmaya Sîstemê Konfederalî yê Demokratîkî awan kerd. Sosyalîzm komelbîyayîş, komunbîyayîş o. Cuya komelkîye seba her beşî girîng a. Ganî cinîyî zî cuya xo ya komelkîye bi yewîya xo  awan bikerê. Cinîyî ganî bi rayîrê nê komunan xo bipawê zî. Bi taybetî vera şîdetê camêrdan û dewlete.

Çîgdeme: Proses prosesêko girîng o. Ercnayîşê ma yê serê têkoşînê sosyalîzmî têkoşîno komunal o. Ganî ma bizanê ke prosesêkê tarîxî de tena seyr nêkerê, tewrê prosesî bibê. Ganî têgêrayîşê cinîyan hem Kurdîstan de hem zî Tirkîya de pîya têkoşîn bikerê. No do têkoşînê komelê demokratîkî û haştîye pîlêr bikero, geş bikero. Hêzê cinîyan pîl o. Ganî cinîyî bi hawayêkê rêxistinkerdeyî têbigêrê.