Cemxaneyê Amedî bêelektîrîkî keweno serra newîye

Temsîlkaranê PSAKDyî yê Amedî derheqê birnayîşê elektîrîkî yê cemxaneyî de qisey kerd û vat: "Ma heqê xo wazenê. Senî ke dezgehanê bînan rê îmtîyazî yenê mojnayene ganî ma rê zî bêrê mojnayene. Ma do têkoşînê xo rê dewam bikê."

Komeleya Kulturî ya Pîr Sultan Abdalî ya Amedî (PSAKD) muracatê Mehkemeya Huqûqê Aslîyî ya 5. kerdbi ke cemxaneyî bi hawayêkê fermî sey îbadetxaneyan bêrê qebulkerdene û mesrafê ci hetê dewlete ra bêrê dayene. Prosesê hukmî dewam keno la elektîrîkê cemxaneyî yê PSAKDî hetê DEDAŞî ra 14 mengî verê cû ame birnayene û abonetîya ci ameye batalkerdene.

Sereko verên ê PSAKDyî Cafer Kolumanî derheqê babete de PÎRHA reyde qisey kerd û vat: "Tîya îbadetxaneyê elewîyan o ganî statuyê îbadetxaneyan ci rê bêro dayene. Bi seserran o cemxane cayê ma yê îbadetî yo. Ma hema zî mexdur ê. La ma bêhêvî nîyê. Îmkanê ma estê ma hewcedarê lutufê çewî nîyê. Ma têna seba heq û edaletî têkoşîn kenê. Ma na bira mehkeme şermezar kenê."

Endamê Îdareyê PSAKDyî yê Amedî Mahsunî Karamanî vat: ''Ma cemxane de bêelektîrîkî îbadetê xo kenê. Ma bi nê hawayî şinê verê serra newîye. Ma do seba pêro elewîyan û cemxaneyan têkoşînê xo rê dewam bikerê.

Endamê PSAKDyî Alî Apaçikî vat: "Zulmo ke bi seserran o elewîyî ancenê hema zî bi nê hawayî dewam keno. Ma bêelktîrîkî serra newîye rê vanê ma bi xêr dî. No şermê na dewlete yo. Ma zî sey xirîstîyanan, misilmanan bacê xo danê. Coka ganî heqê ke înan rê yenê dayene ma rê zî bêrê dayene. Elewîzî ganî bieşkê îbadetanê xo bi hawayêkê azadî bîyarê ca."

Endamê bînî Îmdat Aksoyî zî wina vat: "Sey elewîyan xora ma zî wazenê bibê wayîrê heqanê têdûştan. Senî ke camîyan rê, dêran rê elektîrîk bêpere yeno dayene cemxaneyan rê zî bêpere bêro dayene. Derheqê na babete de xebata ma do dewam bika. Ma têna heqê xo wazenê. Senî ke ê bawerîyanê bînan rê îmtîyazî yenê mojnayene ganî ma rê zî bêrê mojnayene. Heta ke ma netîce bigêrê ma do têkoşînê xo rê dewam bikerê. "