Bi wesîleya Roja Heqanê Domanan a Dinya ya ke ewro reya 30. yena fîrazkerdene Fonê Hetkarîya Domanan a Neteweyanê Yewbîyayeyan raporêk weşana. Raporî de ame parekerdene ke çend averşîyayîş esto zî bi mîlyonan domananê ke nêweşîyê înan nêameyî weşkerdene wefat kerd.

Raporî de ame vatene, 20ê teşrîna peyêna 1989î wextê tesdîqkerdişê Peymana Heqanê Domanan ra heta nika heqê domanî aver şîyî û ame îdîakerdene ke têkoşînê vera nêweşîyan astêka serkewte de yo. Hûmara domananê ke wayîrê cuyêka başe yê bîye zêde, xizmet û xebatê weşîye bîyî zêde. Gore raporî dinya de her roje 15hezar domanî nêweşîyan ra yenê astengkerdene û weşkerdene û mirenê. Serre de 5.5 mîyon domanî naye ra mirenê.

Raporî de bale ameye antene têkoşînê vera nêweşîyan ser ke domanan ro gef wanenê. Gore raporê UNICEFî babeta astengkerdişê zewijîyayîşê domanan de mîyanê 30 serran de averşîyayîş estbi zî herêmanê feqîran de zwijîyayîşê domanan hema zî zêde yo. Raporî de ame mojnayene ke babetanê weşîye, wayîrvejîyayîşî û perwerdeyî de zî hema meseleyê giranî estê û hişyarî ame kerdene ke beno ke vurîyayîşê îklîmî ra tay felaketî bêrê meydan û seba domanan îstîsmarê înternetî  tehlûkeyêko pîl o. Raporê UNICEFî de ame vatene ke seba heqanê domanan ganî pêro welatê dinya birranê hemparan bigêrê û pîya gaman bierzê.