Kampa Multecîyan a Şehîd Rûstem Cûdîyî (Mexmûr) de tay cinîyê ciwanî seba ke wayîrê ked, name û vîrameyîşê embaza xo Avyane Buldan vejîyê Kargehê Şehîde Avyane Buldan de berhemanê hunerê destan virazenê.

Xebatkaranê Kargehê Şehîde Avyane Buldan ra Mizgîne Kara ANFyî rê qala xebatanê kargehî kerde.

Mizgîne da zanayene ke 2018 de binê sîwana Têgêrayîşê Cinîyan ê Ciwanan ê Mexmûrî (TJCM) de sey Meclîsê Şehîde Axîne Mahîr Dîcle (Derya Karahan) înan dest pê karê hunerê destan kerdo û heta berhemê xo wextêk îxrac zî kerdêne. Mzigîne îfade kerd ke ablûqa ra hînî ê nêeşkenê berhemanê xo îxrac bikerê.

Mizgîne pare kerd ke seba ke vîrameyîşê embaza xo Avyane bipawê, debara xo bikerê û xo aver berê înan 2018 de no kargeh awan kerdo. Mizgîne vat: ''Ma waşt ruhê embaze Ayvane tim ma de biciwîyo. Çunke na kede keda embazanê sey aye ya.

Kargeh de 5 cinîyê ciwanî xebitîyenê. Eleqeyê zêdeyî ra dima înan bînaya kargehî vurnaya û barê bînayêka hîna hîra kerdo.  Mizgîne vana: ''Bi taybetî dadîyê ma zaf eleqe mojnenê ma, vanê keda ma xo vîr a mekerê. Ciwanî hîna zag kefê sîya û sipîyî tercîh kenê. Reyna sembolê Şorişê Rojawanî zî sey zîynet û kincî zaf eleqe vînenê.''

Wexto ke ma Mizgîne de qisey kenê xebatkarêka bîne Şevîne Taş zî rîyê ci de huyayîş zîynetêkî kena destê cinîyêke. Şevîne vana: ''Ge ge yew berhem 4 menganê ma gêno. Ge ma goreyê zerrîya xo berhemî virazenê ge zî goreyê zereyê muşterîyan virazenê. Ma berhemanê xo medyaya dîjîtale de pare kenê û resnenê xeylêk kesan.''