Festîvala Fîlmanê Kurdan a Londonî (LKFF) bi şîarê ‘’Ancî Govende’’ emser reya 14ine hîkayeyanê çar parçeyanê Kurdîstanî bi rayîrê sînema ana ziwanî.

Festîvale de hêverî fîlmê dîrektorê Hisham Zamanî ‘’Rojeke Şad’’ ame mojnayene ke fîlm qalê koçberîye keno.

Fîlmê dîrektor Bîlal Korkutî ‘’Bîraxane’’ zî dima ame mojnayene ke bi atmosferê şîîranê Arjen Arîyî ameyo viraştene.

Belgefîlmê Medîha Guzelgun  ‘’Xerîbiya Sêyem’’ qalê hîrê wayan keno ke ê şahîdê Qirkerdişê Maraşî yê.

Filmê Ayşe Polat ‘’Li Piniya Kor’’ qalê cînayetanê faîlî meçhulan keno. 

Ancî çarçewa festîvale de xeylê fîlmê kilmî yê bînî ameyî mojnayene. Festîvale 58 fîlman ra meymandarîye kerde.

Sîyasetmedar Osman Baydemîrî festîvale de qisey kerd û vat ke na festîvale xoverdayîşê kurdan bi rayîrê sînema eşkera kena.

Nuştoxa sînema Seraye Genç û dîrektora bernameyê LKFFyî Şehrîbane Suyur bale ante ser ke festîvale emser cayêko girîng dayo cinîyan.

Dîrektor Soleen Yusif da zanayene ke ganî sînemagerê kurdî yew bibê û festîvalê winayênî bizêdîyê.

Pedegog û rojnameger Alaaddîn Sîyanîçî vat ke ganî sînemaya kurdan hîna aver şora.

Dîrektor Bîlal Korkutî rexneyê ‘’Sînemaya kurdan tena dejan ser de vindena’’ ser o vat: ‘’Raştîya ma çi ya ma ê çî mojnenê. Eke birînê ma weş bibê ma do verê xo bidê fîlmanê kêfweşan.’’