Destana Memê Alan û destana Mem û Zîne eynî nîyê. Zaf kesî destana Mem û Zîne ya Ehmedê Xanî zanenê labelê Memê Alanî nêzanê. Nê di destanî yewbînî ra cîya yê. Yanî destana Memê Alan fekkî ya û destana Mem û Zîne nuştekî ya.

Destana Memê Alan zaf kehen a û na destane nuştekî nîya, fekkî ya labelê destana Mem û Zîne nuştekî ya. Ehmedê Xanî serra 1695 de wexto ke destanê Mem û Zîne nuşt,e ey destana Memê Alan a ke bi serran o ameye vatene û reşte wextê ey, xo rê sey bingê girewta û destana Mem û Zîne nuşta. Hetê bînî ra destana Memê Alan zî reşta roja ewrojî û serra 1942 de fransiz Roger Lescotî na destana dengbêjan ra girewta û nuşta. 

Baş nêno zanitene ke destana Memê Alan key vejîyayo. Labelê seba ke  zaf motîfê îslamî tede est ê yeno vatene ke na destane îslamî ra pey vejîya meydan. Reyna seba ke Memê Alan padîşahê şaristanê Mixribî yo û no şaristan şeş mengî Cîzre Botan ra dûrî yo, wextê eyyubîyan de bîyo, yeno vatene ke beno ke na destane o tw ameya nuştene. Çunke eyyubîyan zaf welatê ereban girewte binê bandora xo û Mixribî yo ke destane de nameyê ci derbaz beno  îxtîmalo pîlo ke Yemen yan zî Misir de yo.

Bingeyê nê her di destanan zî eşq o labelê mîyan de zaf ferqî zî est ê. Ma nika cêr ra verê nê di destanan binê têver û ferqo ke mîyan de est o bivînê.

* Destana Memê Alan fekkî ya û destana Mem û Zîne nuştekî ya.

* Destana fekkî de nameyê Memî, Memê Alan o; nameyê Zîne zî Zîna Zêdan a. Destana nuştekî de nameyê ci Mem û Zîn a.

* Zîn û Stî her di destanan de waya begê Botanî ya.

* Destana nuştekî de Mem botanij o, destana fekkî de Memê Alan mixribij o û padîşahê kurdan o. Nameyê pîyê ci Elî Beg o û Elmaz û Emer zî di apê ci yê.

* Destana nuştekî de embazê Memî yê nêzdî Tacdîn, Arîf û Çeko yê; destana fekkî de nê hîrê birayî Hesen, Çeko û Qeretacdîn o û nm Cîzra Botan ra yê. Stî xanima Hesenî ya û Zîne zî nîşankerda Çekoyî ya.

*Destana nuştekî de Mem û Zûne yew roja Newroze de yewbînî vînenê û maşiqê yewbînî benê. Destana fekkî de yew şewe perîyî Zîne Cîzra Botan ra gênê û benê şaristanê Mixrîbî yê Memî. 

* Bek her di destanan de zî ca gêno. Destana fekkî de Bek fesat û kesêko xirabin o, nêwazeno ke Mem û Zîne biresê pê û seba nê amancê xo her çî keno. Destana Fekkî de yew waya Bekî ya ke nameyê ci Zîn a est a û Bek wazeno ke Mem kênaya ey reyde bizewejîyo.

* Her di destanan de zî Begê Botanî Memî erzeno zindan, labelê destana nuştekî de Mem rîyê qehrî ra mireno, destana fekkî de zî Mem rîyê hênara ke jehrin a û kena Beko yê Zîna daya ci mireno. Her di destanan de Zîne rîyê qehrî ra mirena.

* Destana nuştekî Bek hetê Tacdîn ra yeno kiştene. Destana fekkî de hetê baxçewanêk ra yeno kiştene.

* Destana fekkî de dima merdişê Memî Hesen û birayê ci kesêkî Bozê Rewan ra kenê aspar û ruşnena Mixrib, xebere danê keyeyê Memî.

* Destana Memê  Alan seba ke fekkî ya ziwanê ci sade û ziwanê şarî yo. Ziwanê destana Mem û Zîne seba ke nuştekî yo giran o. Ehmedê Xanî seba ke destane ahengê kafîyan baş bîyaro ca erebkî û fariskî ra zaf çekuyan xebitneno.