Koma Awazê Çiya deyîra xo ya newîye ya kirdî  ya bi nameyê 'Gurbetellî' vila kerde. Deyîre û klîbê ci ewro MED Muzîk TV û portalanê dîjîtalan ser o ame parekerdene.

Endamanê kome da zanayene ke bingeyê muzîkî û şîîra na deyîra kirdkî 19 serrî verê cû hetê welatperwerê çewlîgijî yê bi nameyê Xalisî ra amebi dayene.

Endaman eşkera kerd ke deyîre seba vîrameyîş Şehîde Gurbetellî Ersoz ameye amadekerdene û vat: ''Ma şexsê embaze Gurbetellî de seba pêro kedkar û şehîdanê çapemenîye na deyîre pare kerde. Ma pê bawer ê ke qelema nê embazan do têkoşînê ma berzêr bikera.''

Koma Awazê Çiya  serrgêra 23. ya şehadetê ci de şehîda çapemenîya azade, mudira cinîye ya verêne ya çapemenîye Gurbetellî Ersoz ser o na deyîra bi kirdkî vate.

Vatişê deyîre wina yê:

 

Ko' pîl pîyêr bî balişnê ti wa

Deşton û merg bî doşêk ti wa

Vora sipî lahêf ti wa

Şo keynê ma tû r' oxir bo

 

Gurbetellî Gurbetellî

Gurbetellî Gurbetellî

Qelemê ti bîya xençerî

Gina sêr cigêr dişmenî

 

Ti sîmin a ti zerdin a

Ti melekê ezmonon a

Ti sînayê sêr zerron a

Şo keynê ma tû r' oxir bo

 

Gurbetellî Gurbetellî

Gurbetellî Gurbetellî

Qelemê ti bîya xençerî

Gina sêr cigêr dişmenî

 

Deyîrbaz : Awazê Çiya

Vatiş û Muzîk: Xalis

Şirove û Aranje: Awazê Çiya

Herêm: Çewlig