Hemserekê Konseya Rayberdişî ya KCKyî Cemîl Bayikî ANFyî rê serebût, xoverdayîş û têkoşînê serra 2024î ercnayî.

Beşê yewinî yê roportajê Bayikî ra tayê noqtayê girîngî wina yê:

''Hemleya 'Rayber Apoyî rê Azadîye, Meseleya Kurdan rê Çareserîya Sîyasîye' (Hemleya Azadîye) 2024 de bi xurtî dewam kerd. Şarê ma, têgêrayîşê ma, dostê ma, cinî û ciwanî bi xurtî wayîrê na hemle vejîyê. Têkoşînê seba azadîya Rayber Apoyî de Hemleya Azadîye astêka tewr pîl a. Hemleya Azadîye netîceta tesîrê fikranê Rayber Apoyî de hendê vilayê dinya bîye. Rayber Apo bi xo resa raştîyêka globale. Seba ke dinya wayîra fikranê Rayber Apoyî vejîya wayîra Hemleya Azadîye zî vejîyaye.

Rayber Apoyî pêvînayîşê 23yê teşrîna verêne ya 2024î de bi xo îfade kerd ke tecrîd dewam keno. La ne zîndan ne zî tecrîd nêeşkeno ke fikrê Rayber Apoyî pûç bikero. Hemleya Azadîye 2024 de netîceyê girîngî girewtî. Wayîranê Nobele seba azadîya Rayber Apoyî mektube nuşte, her ca de çalakîyî ameyî kerdene, kitabê Rayber Apoyî ameyî wendene. Zîndanan de embazanê ma û koyan de gerîlayan zî Hemleya Azadîye aver berde.

Naye ra pey ganî na hemle bêra netîcekerdene. Komîteya Wezîran a Konseya Ewropa derheqê heqê hêvîye de bire daye. No zî serkewtişêkê hemle yo. Ganî naye ra pey şarê ma û dostê ma hîna zaf wayîrê hemle vejîyê. Kadroyê PKK û KCKyî, şarê ma yo welatperwer, sempatîzanê ma û dostê ma ganî xo seba serkewtişê hemle hîna zaf rêxistin bikerê.

Dewlete wina pawena ke ma derheqê sîstemê Îmraliyî de tawîzan bidê. La Rayber Apo bi xo çîyê winayênî nêkeno. Rayber Apo tim hetê şaran û azadîye gêno. Rayber Apoyî pêvînayîşê xo yê bi Omer Ocalanî de rewşe bi zelalî eşkera kerde û vat ke tecrîd dewam keno. Eşkerayîyê Bahçelîyî û selahîyetdaranê dewlete yê bînan manîpulatîf ê. Ê wina mojnenê ke seke çîyêko pozîtîf do bibo, meseleya kurdan çin a û dewlete dişmena kurdan ney tena dişmena PKKyî ya. Yanî şero taybet ho yeno kerdene. 

Hetê bînî ra bêguman dewleta tirke neçare mende ke muxatabîya Rayber Apoyî qebul bikera. Seba ke têkoşînê azadîye zor da dewlete û îqtîdar ê neçare mendî ke na raştîye qebul bikerê. Têkoşînê ma yê 2024î mîyanê îqtîdarî de şikîyayîşî viraştî. Gerîlayî bin nêkewtî, şarê ma sereyê xo nêard war û bi nê hawayî konseptê tasfîye bênetîce mend.

La dewleta tirke û îqtîdarê AKP-MHPyî plananê qirkerdişî ra dewam keno. 2024 de hêrişê vera têgêrayîş û şarê ma zêdîyayî. Ancî rijîyayîşê Sûrîye ra pey dewleta tirke verê xo da Rojawanî no zî mojneno ke planê îşxal û qirkerdişî do dewam bikerê.

Rayber Apo bi komployêkê mîyanneteweyî teslîmê Tirkîya ame kerdene ke mîyanê nê komployî de hêz û dezgehanê mîyanneteweyîyan zî cagirewt. Sere de Amerîka, Îsraîl û Îngilîstan hêzê modernîstî PKKyî verê xo de sey tehlukeyî vînenê. Sîstemê Îmraliyî hetê nînan ra zî yeno îdarekerdene. Îmrali de huqûq çin o. Dezgehê sey CPTyî pabesteyê hêzanê mîyanneteweyîyan ê.

Rixmê îşkence û kerdişanê Îmraliyî zî CPT, Mehkemeya Heqanê Merdiman a Ewropa (MHME), Konseya Ewropa û Komîteya Wezîran bêveng mendî. CPTyî çend rey Îmrali zîyaret kerd la raporê xo eşkera nêkerdî. MHME 2014 de bira heqê hêvîye daye la 10 serran seba caardişê na bire zor nêda Tirkîya. Dewleta tirke zî nînan ra paştî girewte û tecrîd giran kerd.

Komîteya Wezîrane êlule de bire daye ke heqê hêvîye bêro caardene la serrêke wext da dewleta tirke. No nêno qebulkerdene. Eke huqûq est o ganî cade na bire bêra caardene. Ganî dezgehê mîyanneteweyî bikerê ke dewleta tirke tecrîdî wedarna, Rayber Apo azad bibo.''