20ê teşrîna verêne de Başûrê Kurdîstanî de weçînayîşê parlamentoyî est ê. Cinîyanê Kampa Multecîyan a Şehîd Rûstem Cûdîyî ya Mexmûrî derheqê babete de ANFyî rê qisey kerd.

Zelîxa Şirnexî pare kerd ke wa şarê Başûrî destê xo bero wijdanê xo, wina raya xo bido. Zelîxa vat: ''Kamyew partî û kes seba şarê Başûrî hol ê û do bieşkê erdê ma bipawê raya xo bidê nînan. Êyê ke dewaya welatî kenê tepişîyenê, îşkence vînenê. Ciwanê Başûrî bêkarî û xizanîye ra verê xo danê Ewropa. Erdê Başûrî hetê dewleta tirke ra yeno îşxalkerdene. Na rewşe de ganî şarê ma wayîrê şehîdan û qehremananê xo vejîyo. Ma rayîr nêdê xayînan.''

Taybet Mijînî vat: ''Şarê ma yê Başûrê Kurdîstanî bi zehmetî statuyêk vist destî la binê tehlukeyî de yo. Wa şarê ma çimê xo abikero. Ma raya xo bidê partîyanê welatperweran. Êyê ke vera kişîyayîşê doman û cinîyan vengê xo vejenê, ma raya xo bidê înan. Ez venga şarê Başûrî dana ke şoro sindoqan ser. Êyê ke parlamento de do bieşkê dewaya heqê cinîyan û erdê Kurdîstanî bipawê, rayanê xo bidê înan.''