Endamê Konseya Rayberdişî ya KCKyî Mustafa Karasuyî beşê hîrêyînî yê roportajê xo de ajansê ma rê şerê Îsraîlî, rewşa Rojhelatê Mîyanênî û rewşa dewleta tirke ercnayî. 

Qiseykerdişê Karasuyî ra tay noqtayê girîngî wina yê:

''Hamasî 7ê teşrîna verêne ya 2023yî de bi hêrişê xo firsend da Îsraîlî. Erdoganî nê hêrişî de ardimê Hamasî kerd ke rayîrê enerjî  yê Îsraîlî sabote bikero. Îqtîdarê AKP-MHPyî bi plananê xo Tirkîya zî viste binê tehlukeyî. Dewleta tirke û îqtîdar pêro enerjî, hêz û îmkananê xo seba qirkerdişê kurdan xerc kenê. La netîceya nê plananê xo de Rojhelatê Mîyanênî de teberê plansazîyan de mendî.

Xora Amerîka paştî dana Îsraîlî. Wina aseno ke Îran do xo biqefilno û wextêk bêtesîr bimano. Beno ke Îsraîl û Îran zî hêrişê yewbînan bikerê. Rojhelatê Mîyanênî de dewletî do bêhêz bibê la şarî do prosesan aver berê. Îsraîl do nêeşko heta peynî wina şer bikero. Seba çareserîya meseleya Filîstînî sîstemê Konfederalîzmê Demokratîkî lazim o. 

Tirkîya nêeşkena Îsraîlî sey 'bêbawerî û bêaramî' bimojna û rayîrê enerjîya G-20î asteng bikera. Hendê hêzê Tirkîya çin o û şantajê ci zî do fayde nêkerê. Tirkîya teyna eke meseleya kurdan çareser bikera do aram biba. 

A raşte Tirkîya dişmena Îsraîlî nîya. Tirkîya wazena ke Amerîka û Îsraîlî goş bidê ci ser. Tirkîya kena ke pê hêrişanê Îsraîlî bitersna, komel û muxalefetî dîzayn û bêtesîr bikera. Erdogan xora  yew demogog o. 

Biewnê Tirkîya de bêedaletîyî resayî asmênî. Bi taybetî nê des serranê peyênan de vera kurdan tedayî zêdîyayî. La Erdogan vano ke ê zaf qîmet danê edaletî! Ewro pêro mehkemeyê Tirkîya destê Erdoganî de yê. Erdogan roniştişê Neteweyanê Yewbîyayeyan de heq û wijdanî ra behs keno. La mabênê Erdoganî û Netanyahuyî de ferqêk çin o. 

Mabênê kerdişanê dewleta tirke û Îsraîlî de zî ferqêk çin o. Dewleta tirke herêmanê Rojawanî îşxal kena, her roje bombayan varnena, çekanê qedexeyan şuxilnena ûsn. Îqtîdarê Erdoganî îqtîdarê dişmenê cinîyan o zî. La Erdogan seke femînîst o qisey keno. 

Îqtîdarê AKPyî teyna Kurdîstan û Tirkîya de ney pêro Rojhelatê Mîyanênî de temsîlkarê kanwazî, antîdemokrasî û dişmenîya cinîyan o. Dewleta tirke kena ke kurdan qetil bikera, biqedîna, erdê kurdan bi temamî îşxal bikera. La hetê bînî ra nê dersê merdimatîye danê. Erdogan hendê bêşerm, bêwijdan û bêexlaq o.''