Endamê Konseya Rayberdişî ya KCKyî Mustafa Karasuyî ANFyî rê rojdem erjna. Beşê diyînî yê qiseykerdişê Karasuyî ra qismêk wina yo:

''Rayberê MHPyî ke dişmenê kurdan o û teberê qirkerdişê kurdan de yewna polîtîkaya ci çîn a, qey destê wekîlanê DEM Partî girewt? Devlet Bahçeli DEM Partî zî tede derheqê sîyasetê demokratîkî yê kurdan çi vato xora yena zanayene. Xeta polîtîke ya MHPyî çîyo ke heta ewro vatî ê yê. La qey inkey dest girewt? Devlet Bahçeliyî goreyê xo sebebê destgirewtişî eşkera kerdî. La raşt nêvat. Verê akerdişê meclîsî Tayyip Erdoganî keyeyê ci de Behçeli zîyaret kerd. Destgirewtiş û polîtîkaya newî ya vera DEM Partî, bi vatişê bînî kayo newe nê pêvînayîşî de ame hazirkerdene. Îhtîmalo pîlo ke no kay hetê Erdoganî ra ame plankerdene û Behçeliyî rê dîya qebulkerdene. Hemsereka ma ya Konseya Rayberdişî ya KCKyî Besê Xozat no sey kayê neweyî erjna. Badê nê destgirewtişî cade tay hetan wina  'Îtîfaqê Cumhurî  DEM Partî reyde prosesê çareserîye yê neweyî dano destpêkerdene' vat.

Ma cade nê vajî ke nabênê serranê 2007-2015î de prosesê çareserîye yo raşt çîn bi, nêbi. Rayber Apoyî  cedh kerdêne ke îqtîdarî bifîno mîyanê wina yew prosesî. Xora eke Mutabakatê Dolmabahçe rinda bêro cigêrayene, famkerdene na raştîye yena vînayene. Verî ke no mutabakat bêro weşanayene ma rê ame teqdîmkerdene. Ma waşt wa di madeyê bînî bêrê serkerdene. La Rayber  Apoyî vat çîyê ke mutabakat de ca genê bes ê. Tayê rixmo ke nêxanê, vanê 'Rayber Apoyî mutabakat kêm dîyo û  rexne kerdo' la no  raşt nîyo. Rayber Apoyî waşt îqtîdarê AKPyî û dewlete bifîno mîyanê prosesê çareserîye. La Erdogan û dewlete mutabakat red kerd. Xora teşrîna verên a 2014î de 'Planê Çokdayîşî' dîya destpêkerdene. Tayê vanê 'PKK proses qedîna' no qetîyen raşt nîyo.

AKP wexto ke newe bi îqtîdar seba ke hetê tay hetan ra nêame qebulkerdene, mesajê nermî dayî kurdan. Waşt verî mîyanê dewlete de tam ca bido. Coka nêweşt Têgêrayîşê Azadîye yê Kurdan reyde pêkewtişan ciwîyo û zehîf bikewo. Bi rayîrê mîyankaranê cîya cîyayan têgêrayîşê ma ra waşt wa pêkewtiş mevejîyo. Rayber Apoyî hetê wextî ra raşt mevîno zî na rewşe seba ke îqtîdar û dewlete bianco mîyanê prosesê çareserîye qebul kerd û  keda pîle daye. Seba ke paşta ci îqtîdarî ra pêt nêbî nê prosesî de hêzê demokratîkî yê kurdan û Tirkîya esas girewtî. Seba ke kurdî û tirkî pîya îtîfaq bikerê û  têkoşînê hemparî  bikerê, projeyî teqdîm kerdî. Na babete de game xurtî ameyî eştene. Erdoganî Mutabakatê Dolmabehçe red kerd û vera Têgêrayîşê Azadîye yê Kurdan û heme hêzanê demokrasîyî şer da destpêkerdene.

Inkey badê şerê qirkerdişê leyminî yê 9 serran kam pê bawer o ke îqtîdar prosesê çareserîye dano destpêkerdene! Kam eşkeno vajo MHP waştişê qirkerdişî caverdayo?

Semedê Tirkîya çareserkerdişê meseleya kurdan ra rindêr yewna çî çîn o. Xora ma tim çareserîya demokratîke wazenê. Tay kanalê muxalîfî zî çew vano qey prosesê çareserîye xirabo, wina muneqeşeyan kenê. Ganî ê vajî meseleya kurdan ganî bêro çareserkerdene, semedê demokratîkîbîyayîşê Tirkîya no hewce keno. La zîhnîyetê îqtîdarî nêeşkeno na mesela çareser bikero. Eke îqtîdar raşta wazeno mesela çareser bikero ganî gamanê ci bierzo. Eke wazenê kayê îqtîdarî bixeripnê ganî wina vajê. Kurdî zî ganî vajê heta ke nê polîtîkayî mebedilîyê ê do kayana mexapîyê. Îqtîdar wazeno kurdan têkoşînî ra bifîno dûrî  ke polîtîkaya qirkerdişî dahîna rahat bîyaro ca. Coka wazeno sereyê tay kurdan bikero têmîyan ke wa vera PKKyî bivejîyê.

Tewirê nê prosesî muhîma o. CHP eşkeno înîsîyatîf bîgêro û vajo 'eke meseleya kurdan bêra çareserkerdene, ma zî paştî danê ci.' Eke CHP patşî bido çareserkerdişê meseleya kurdan eşeno xeta demokratîke de ronişo. Wa no mêro vîrakerdene ke îqtîdarê AKP-MHPyî hukmatê şerê taybetî yo. Nê îqtîdarî ra semedê kurdan çîyo pozîtîf çew nêeşkeno bipawo. Têna yew waştişê MHPyî est o û zî qirkerdişê kurdan o. Îqtîdaro faşîst wazeno DEM Partî bido xapî ro.Veng dano û çîyê ke DEM Partî nêeşkena qebul bikera do tira biwazo. Dima ra do vajê ma destê xo derg kerd la înan nêgirewt û hêrişanê xo xurtêr bikerê. Hêzê demokrasîyî yê kurdan eşkenê vajê ‚ ma xora çarserîye rê hazir ê la verî ganî tecrîdê Îmraliyî bêro wedaritene. Wina eşkenê kayê înan bixeripnê.

Nê hetî ra destgirewtişê Devlet Bahçeliyî semedê sîyasetê şerê taybetî yo. Vatiş û kerdişê Bahçeliyî ra çîyêk pawitiş yeno manaya famnêkerdişê raştîya dewleta tirke û polîtîkaya qirkerdişî ya vera kurdan.''