Endamê Konseya Rayberdişî ya KCKyî Mustafa Karasuyî derheqê rojdemî de ANFyî rê qisey kerd.

Qiseykerdişê Karasuyî ra tayê noqtayê girîngî wina yê:

''Rayber Apoyî 26 serrî yo Îmrali de xoverdayîşêkê destanwarî keno. Ey sey rayberê şarêkî pêro helê xo bi fikirîyayîş û ercnayîşî vîyarnayî. Ey roja verêne ya esaretê Îmraliyî ra dima tim kerd ke senî komplo pûç bikero. Xora komployî îmha û tasfîyekerdişê Rayber Apoyî armanc kerdêne. Ey xorexnekerdişo ke çewî nêkerdbi kerd, sosyalîzmo reel rexne kerd û paradîgmaya xo awan kerde. Xêrê nê xîretanê Rayber Apoyî ra PKKyî zî esasê paradîgmaya newîye de têkoşînêko bitesîr da destpêkerdene. 

Rayber Apo xora domanîya xo ra nata komelgîr bi û na hişmendîye sosyalîzm de dîye. Ey seba ke vera kapîtalîzmî têkoşînêko xurt bêro kerdene, sosyalîzmê reelî ra fek vera da û sosyalîzmêko hîna komelkî tesdîq kerd. Rayber Apoyî bi nê fikranê xo çareserîyî Îmrali de pêşkêş kerdî û şîfreyê dewletanê herêmîyan fam kerdî. Bi nê hawayî têkoşînê Rayber Apoyî zî pîlêr bi, meseleya kurdan hîna zaf ameye dîyene. Yanî têkoşînê Îmraliyî yê Rayber Apoyî armancê komplogeran pûç kerdî. Rayber Apo hema zî binê esaretî de yo la Komployo Mîyanneteweyî bin kewt, Rayber Apo ser kewt.

Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' hemleyêka serkewte ya. Bi taybetî warê mîyanneteweyîy de hemle bîye pîlêr. Ganî no zemîn hol bêro şuxilnayene. 2025 de ganî hemle bêra xurtêrkerdene. Serra diyîne ya hemle de ganî bi taybetî têgêrayîşê cinîyan hîna zaf destek bidê. Serra yewine de dezgehê sey Konseya Ewropa bi tesîrê hemle têgêrayî. Serra diyîne de nê do hîna zaf têbigêrê. 

Şarê ma yê Vakurê Kurdîstanî bi xurtî wayîrê Hemleya Azadîye vejîya. Mîtîngê Amedî yê 13ê teşrîna verêne seba xurtêrkerdişê hemle destpêk bi. Serra diyîne de Vakurê Kurdîstanî de hemle ganî bi metodanê zengînan bêra kerdene. Eke cinî û ciwanî bi xurtêrî tewrê mîtîngan bibê hemle do pîl bibo. Ancî serra yewine de şarê ma yê Rojawan û Ewropa zî hemle de rolêko pîl  kay kerd. Ganî nê serra diyîne de hemle hîna zaf vila bikerê.

Dewleta tirke 4 serrî yo bi pêro îmkananê xo hêrişê Herêmanê Pawitişî yê Medya kena. Gerîlayî zî bi metodê şerê tunel û tîman zor danê dewleta îşxalkere. Gerîlayî bi bedelanê pîlan têkoşîn kenê. 2024 de gerîlayanê ma çalakîyê zixmî kerdî. 

Dewleta Iraqî bi pêkerdişê dewleta tirke sûcêko pîl kerd. Gerîlayî 50 serrî yo seba azadîya şarê xo têkoşîn kenê. Gerîlayan vera DAÎŞî zî şer kerd û erdê Iraqî pawit. La Iraqî bi hawayêkê bêexlaqî dewleta tirke de pêkerd. 

PDKyî xora nê 4 serran de îxanetê xo bi zelalî eşkera kerd. Nika Başûr de weçînayîşî est ê. Eşkera yo ke herêmanê PDKyî de weçînayîşêko edîl do nêbo. PDK tedaya nê herêman keno. Şarê Başûrî ganî nê weçînayîşan de îxanetê PDKyî ceza bikero. Wa şarê ma yê Başûrî raya xo bido namzedanê welatperweran. Ganî nê weçînayîşan de xayînî û welatperwerî dîyar bibê.''