Hemserekîya Konseya Rayberdişî ya KCKyî derheqê Mîtîngê Azadîye yê Amedî yê 13ê teşrîna verêne de eşkerayîyêke daye. Eşkerayîye wina ya:

''13ê teşrîna verêne de, Amed de Mîtîngê Azadîye ame kerdene. Sere de şarê Amedî pêro şarê ma Serhed, Botan, Dêrsim û her cayê Vakurî û Tirkîya ra herikîya Amedî. Rixmê hêriş, qedexe û astengîyanê polîsan zî şarê ma meydanî dekerdî, vera tecrîdî tewirê xo mojna. Şarê kurdî ancî perwerîya xo ya bi Rayber Apoyî mojnaye ra û mesajê xo da.  Ma sere de şarê xo yê Amedî pêro şarê ma yê welatperwerî û dostanê xo zerrî ra fîraz kenê, çalakîyanê nînan selam kenê. Ma hêzanê demokrasîyî û şaranê Tirkîya zî selam kenê. Êyê  ke kewtê rayîr û astengîyan ra nêresayê Amedî, ma nînan zî selam kenê.

Mîtîngê Azadîye de şarê ma vera polîtîkayanê tecrîdî tewirê xo eşkera kerd, mesajêko pîl da. Şarê ma bi zelalî mojna ke muxatabê çareserîya meseleya kurdan Rayber Apo yo. Şarê ma û hêzanê demokrasîyî yê Tirkîya îfade kerd ke bi muxatabîya Rayber Apoyî ganî meseleya kurdan bêra çareserkerdene coka wa tecrîd bêro wedaritene. No tewirê şarê ma do pêro kayan bixeripno. Heta ke Rayber Apo muxatab nêbo ne meseleya kurdan çareser bena, ne haştîye yena Tirkîya ne zî bingeyê çareserîya meseleya kurdan de Tirkîya demokratîk bena. Tecrîdê vera Rayber Apoyî zî vera nê xîretî polîtîkayêk a. Heta ke tecrîd nêqedo haştîye û çareserîye ra behs zî nêbeno. Şarê ma Amed de no ancî îsbat kerd. Şarê ma bi xurtî îfade kerd ke Rayber Apo garantîyê haştî, azadî, yewîya şaran û îtîfaqê şaran o. Nê esasî ser o ma veng danê ka wa mesajê şarê kurdî hol bêro famkerdene û goş bêro dayene ci.

Şarê ma nê mîtîngî de îsbat kerd ke bi xoverdayîşî vera faşîzmî pêro astengîyî eşkenê wedarîyê. Şarê ma ganî nê xoverdayîşê rûmetênî rê heta şiknayîşê tecrîdî û caardişê azadîya Rayber Apoyî dewam bikero û ney vila bikero.''