Fuat Kavî dîyar kerd ke derheqê proses û dîyalogan de beşêkê mîyanê dewlete îqna nêbîyo û nêwazeno ke meseleya kurdan çareser bibo. Kavî dîyar kerd ke seba averşîyayîşê prosesî ganî şert û mercê Rayber Apoyî bêrê raştkerdene.
Nuştox Fuat Kavî derheqê vengdayîşê ‘Haştîye û Komelê Demokratîkî’ yê Rayber Apoyî ajansê ma rê qisey kerd.
Kavî vengdayîşê Rayber Apoyî sey deklarasyonêk pênase kerd û vat: ‘’No vengdayîş eşkeno meseleya kurdan çareser bikero. PKK vurîyayîş û vurnayîşî ercneno. La dewlete heta nika gamêke zî nêeşte. Tayê beşê dewlete hema zî mesele çarçewa ‘terorî’ de ercnenê û derheqê proses û dîyalogan de îqna nêbîyê. Tepişîyayîşê Ekrem Îmamogluyî zî ney de eleqedar o. Beşê ke çareserîye nêwazenê benê sebebê alozîye.
Eşkera nîyo ke no proses do senî şoro. Rewşa PKKyî, şarê kurdî û Abdullah Ocalanî dîyar a la tewirê dewlete zelal nîyo. Vengdayîşî ra dima şert û mercanê Ocalanî de vurîyayîşêk nêbi. Hema zî pêvînayîşî bi qîmî nênê kerdene. Ganî Birêz Ocalan bieşko pêvînayîşan bi serbestî bikero. Caardişê ney zî mesuldarîya dewlete yo. ‘’
Kavî îfade kerd ke qetî şert û mercê Rayber Apoyî bêrê sereraştkerdene û vat: ‘’Awankerdişê kongreyêka PKKyî mumkîn nîyo. Bi teda qet yew partîye kongre nêkena û xo fesh nêkena. Meseleya kurdan 200 serrî ya û têkoşîno çekdar 40 serrî yo. Na mesele bi rehetî çareser nêbena. Coka ganî tewirê AKP, dewlete û Bahçelîyî eşkera bibo. Her çî ra ver ganî şertê Rayber Apoyî bêrê sereraştkerdene.’’
Kavî bale ante rojbîyayîşê Rayber Apoyî yê 4ê Nîsane ser û vat: ‘’4ê Nîsane heman wextî de rojbîyayîşêkê neteweyêke yo.Ganî pêro şayî û aktîvîteyê 4ê Nîsane layîqê Ocalanî bibê. Ma eşkenê 4ê Nîsane sey ganîbîyayîş û rayîrê azadbîyayîşî pênase bikerê. Ez zî rojbîyayîşê Rayber Apoyî fîraz kena.’’
