Parlamentoyê Walesî de bi meymandarîya Serekê Partîya Muxafazakarî Darren Milarî resepsîyonê Newroze ame kerdene. Resepsîyon de bi beşdarîya Meclîsê Şarê Kurdî yê Brîtanya û têgêrayîşanê Kurdîstanîyan parlamenter, akademîsyen, temsîlkarê dezgehan amade bîyî.

Resepsîyon de konserêkê muzîkî yo taybet ame dayene. Şar bi kincanê neteweyîyan tewrê resepsîyonî bi.

Aktîvîsta kurde Sara Hacî xîtabê girseyî kerd û vat ke seba şarê kurdî Newroze roşanê azadî û xoverdayîşî yo. 

Darren Millarî zî roşanê şarê kurdî fîraz kerd û sembola hempare vila ‘Nêrgîze’ ser o vat: ‘’Na sembole erja ma ya hempare û mijdanîya dîyayîşê wisarî ya.’’

Resepsîyon bi gêrayîşê govende qedîya.

Komîteya Têkilîyanê Teberî ya Meclîsê Şarê Kurdî zî Millarî reyde pêvînayîşêk kerd û dosyayêka serê vengdayîşê Rayber Apoyî teslîmê ey kerde. Millarî vat ke ê do tim paştî bidê kurdan.