Heyva Sor a Kurdîstanî semedê hetkarîya bi des hezaran kesan ke rîyê bombardumanê Îsraîlî ra Lubnan ra remayî, veng da.

Eşkerayîye de wina ame vatene: ''Şerê mabênê Îsraîl û Hamasî de 7ê teşrîna verêne ya 2023yî ra nata 42.000î ra zafêr kesî merdî. Rîyê nê rijnayîşî ra bi se hezaran kesî erdê xo ra bîyî. Gama ke merdimîye xîret kena birînane nê şerî bipêşo, nika zî felaketa şerê Lubnan-Îsraîlî dest pêkerd.''

Heyva Sore vist vîrî ke rîyê şerê ke 13 serrî yo Sûrîye de dewam keno nê welatî ra bi des hezaran kesê ke remayî şîyî Lubnan û vat mîyanê înan de xeylêk rojawanijî est ê.

Heyva Sore vat: ''Destpêkerdişê pêkewtişê mabênê Îsraîl û Hizbulahî ra nata Îdareyo Xoser ê Rojawanî semedê pawitişê sûrîyeyîjan xebatan keno. Bi vengdyaîşê  Îdareyê Xoserî 29ê êlule ra nata beranê Tabka û Minbicî ra 13 hezarî ra zafêr kesî kewtî zere.''

Eşkerayîye de ca dîya nînan: ''Heyva Sor a Kurd a Rojawanî kampanyaya hetkarîye daye destpêkerdene ke na kampanya semedê pawitişê bi hezaran kesan ke şerê Îsraîl û Hîzbulahî ra remayî, zaf muhîm a. Coka ma zî xo sey şîrikê na kampanya hesibnenê. Ma zî do welatanê Ewropa, Îskandînavya û Japonya de kampanya bidê rayraberdene.

Kam ke wazeno  mucîranê kurd û sûrîyeyîjan ê ke Lubnan ra remayî, înan rê hetkarî bikero eşkeno bi rayîrê Heyva Sor a Kurdîstanî hetkarî bikero.

Hesabê banka yê Heyva Sore yê semedê hetkarîye wina yê:

Heyva Sor a Kurdistanê e.V.

Kreissparkasse Köln

IBAN: DE49 3705 0299 0004 0104 81

BIC/SWIFT: COKSDE33XXX

PAYPAL: [email protected]

paypal.me/heyvasorakurdistane

Armancê hetkarîye: Macîrê Lubnanî

Heyva Sor a Kurdîstanî bale ante ser ke goreyê qerarê ADDyî eyalatê Rheinland-Pfalz de desturê arêdayîşê hetkarîye yê komelan çîn a.