Paytextê Almanya Berlin de vizêr nêmroje polîsanê almanan eştbi Merkezê Komelê Demokratîkî yê Kurdan ser û Hemserekê NAV-BELî Huseyîn Yilmazî reyde xeylêk kesî destbend kerdbî, dima vera dabî.

Ewro zî tay kesan saete 15.45 de benzîn verda verê merkezî û xîret kerd ke Nav-Berlinî bivêşnê. Dima ke kurdê ke merkez de roniştêne pê serebûtî hesîyayî hêrişkerî panîk bîyî û remayî la adir kewt bîna. Lokalê merkezî de qasê 40 kesî est bîyê. 

Heyetê îdareyî yê Nav-Berlinî wina texmîn keno ke tirkanê nîjadperestan serebût kerdo. Endamê Meclîsê Temsîlkaranê Berlinî sîyasetmedar Ferat Koçakî derheqê hêrişî de gerre kerd.

Hemserekê Nav-Berlinî Huseyîn Yilmazî ajansê ma rê pare kerd ke mezgo ke Mereş û Sêwas de merdimî vêşnabî xîret keno ke Berlin de zî kurdan bivêşno. Yilmazî vat: ''Êyê ke verê nê mezgî de bêveng ê hemkarê nê kerdişan ê. Wa polîtîkayê krîmînalîzekerdişî biqedê. Wa hêzê asayîşî yê Almanya erkê xo yê raştikênî bikerê.''