Fermandaranê Qerargehê Merkezî yê YJA-Starî ra Şerda Mazlum Gabar bîye meymana Radyoyê Dengê Welat û derheqê Hemleya 1ê Hezîrane de qisey kerd. 

Qiseykerdişê Şerda Mazlum Gabar ra beşêk wina yo:

''Wexto ke ma Hemleya 1ê Hezîrane dabi destpêkerdene, vera Rayber Apoyî komloya mîyanneteweyî amebi kerdene. O çax her hetî ra hêrişê ma ameyêne kerdene. Waştêne ke ama xeta Rayber Apoyî ra fek vera bidê. Pêro şarê kurdî û gerîlayî wayîrê Rayber Apoyî û îdelojîya Rayberîye vejîyayî û mojna ke bê Rayberîye cuye nêbena.

Gerîlayî têna mesuldarê çekan nê, mesuldarê raşt famkerdişê Rayberîye û cuya Rayberî yê. Gerîlayî mesuldar ê ke vera tasfîyekeran xeta Rayberîye bipawê. Hêzanê ma pê Hemleya 1ê Hezîrane vera tasfîyekeran cewabêko pîl da. Eke Hemleya 1ê Hezîrane nêbibîyêne PKK û şarê kurdî do çin bîyayêne. Hemleya 1ê Hezîrane, Hemleya 15ê Tebaxe ra dima hetê leşkerî û îdeolojîkî ra hemleyanê tewr girîngan ra yew a. Na hamle xeta Rayberîye de israr kena. 

Rayberîya Hemleya 1ê Hezîrane embaz Kendal Baz (Yusuf Saruhan) kerde ke serra 2004î de Gabar de şehîd bi. Embaz Kendal bi Egîdê prosesî. Hemleya 15ê Tebaxe zî Erûh de amebî kerdene. Kendal zî hema ca de di embazanê ma reyde wesayîtê fermandaranê tirkan îmha kerd.

Slav bi xo Sêrt de çalakîye kerde û pê ruhê Bêrîtane teslîmîyet red kerd û şehîd bi. Dêrsim de Têkoşîn û Seyîd Riza heta guleyanê xo yê peyênan şer kerd û şehîd bîyî. Şehîd Sorxwîn, Adar, Yildiz û Adîl pê çêrîyêka pîle şehîd bîyî. Fermandaran Reşît û Rojîne zî pê tewirê xo tesîrê şerê 2012î kerd. Ewro embazî Alî Pilîng, Çîçeke Botan, Şevîne Bîngol û Têkoşîn Amanos sey dewamê şehîdanê 1ê Hezîrane yê. Rixmê tekonolojî û îstîxbaratê dişmenan zî têkoşînê gerîlayan dewam keno.

Ma çarçewa projeyê newe ra awanbîyayîşî de taktîk û metodî vurnayî. Ma Hemleya 1ê Hezîrane de no proje ard ca. Ma hînî nêeşkenê xo pê xoverdayîş sînordar bikerê, hînî ganî ma serkewtiş tam bikerê. Çalakîyanê 2020î de nê projeyî netîceyê weşî girewtî. Ma cayanê nimitkîyan ra nişka ra da dişmenan ro. Ganî gerîlayî hê ça de yê û se kenê, nêrê zanayene. 

Çalakîyanê taybetan ê YJA-Starî zî darbêka pîle da dişmenan ro. YJA-Star mîsalêka raştikêne ya fermandarî û gerîlatîya cinîyan o. Hêzê YJA-Starî seba pêro cinîyan têkoşîn kenê.

Serra 2020î de ma do konseptê dişmenan îmha bikerê û Komploya Mîyanneteweyîye pûç bikerê. Seba ke şarê ma azad bibo ma do têkoşîn pîl bikerê. Eke ma têkoşîn berz nêkerê, dişmenî do hêrişê pêro erjanê ma bikerê. Dişmenî hêrişê goranê embazanê ma kenê û bi nê hawayî hêrişê rûmetê ma zî kenê Wext wextê wayîrvejîyayîşê rûmet, şeref û erjan o.''