21 rêxistinanê komelê sivîlî yê Şingalî bi wesîleya serrgêra Qirkerdişê 3ê Tebaxe venga hêzanê mîyanneteweyîyan û herêmîyan da ke seba azadkerdişê esîran û newera awankerdişê Şingalî game bierzê.
Bi wesîleya serrgêra 8. ya Fermanê Şingalî 21 rêxistinanê komelê sivîlî yê Şingalî merasîmê yadkerdişî viraşt.
Deqayêkê rêzgirewtişî ra dima seba şehîdanê qirkerdişî findî ameyî tavistene û derheqê fermanî de sînevîzyonêk ame mojnayene. Dima Nadîa Murada ke hetê şerwananê QSDyî ra destê DAÎŞî ra amebî xelisnayene û 2018 de layîqa Xelata Nobelî amebî dîyene, bi rayîrê onlineyî qisey kerd.
Merasîmê yadkerdişî de komê muzîkî vejîyayî sehne ser û înan derheqê fermanî de deyîrî vatî.
Dima 21 rêxistinanê komelê sivîlî eşkerayîyêke daye. Eşkerayîye de ame vîrvistene ke Fermanî ra nata 2 hezar û 882 êzidîyî hema zî vînîbîyaye yê, DAÎŞî 68 cayê tarîxîyî teqnayî û seba newe ra viraştişê binawanîya Şingalî zî hema gamêke nêerzîyaye.
21 rêxistinanê komelê sivîlî yê Şingalî venga hêzanê mîyanneteweyîyan û herêmîyan da ke seba azadkerdişê esîran û newera awankerdişê Şingalî game bierzê, Fermanî sey jenosîdî qebul bikerê, cerganê DAÎŞî muhakeme bikerê û aqîbetê vînîbîyayeyan eşkera bikerê.
