Merdimanê Vînbîyayeyan û Şubeyê Amedî yê Komeleya Heqanê Merdiman (ÎHD) çalakîya xo ya hewteyê 597. kerde. Nê hewteyî zî aqîbetê Abdurrahman Demîr ame persayene ke 17ê tebaxa 1995î de Noqtaya Kontrolî ya Cendirmeyan a Şavelatî de rayîrê Wêranşar-Qoserî de amebi destbendkerdene û dima zî ci ra xeberêke nêameye girewtene.

Endamê Heyetê Îdareyî yê Şubeyê Amedî yê ÎHDyî Yunus Erdoganî derheqê Demîrî de nê çîyî vatî: ''Abdurrahman Demîro 22 serre qezaya Omeryanî ya Mêrdînî de ciwîyayêne. 17ê tebaxa 1995î de seba ke şoro Adana keweno rayîr. Noqtaya qereqolî ya Cendirmeyan a Şavelatî de rayîrê Wêranşar-Qoserî de otobusî ra yeno warardene û yeno destbendkerdene. Şahîdî vanê ke Demîr ame berdene bi Qereqolê Şavelatî. Şewe zî Dadî Kadrîye Demîr rê qereqol telefon keno û vano bêrê lajê xo berê. Dadî zî vana a nêeşkena şora, wa lajê ci vera bidê. Dadî wina fam kena ke lajê aye vera dîyayo. Dima merdimê xo rê ke Adana de yo telefon kena û musena ke lajê aye uja de nîyo. Dadî areye zî pê fotografêkî şina Qereqolê Şavelatî. Selahîyetdarê qereqolî dadî ra vanê ke destê înan de wina yew kes çin o. Keyeyê Abdurrrahmanî zî muracatê dezgehanê fermîyan kerd la hema zî netîce nêgirewte.''