Deweka Kortikî ya dewa Roşnekî ya Dêrsimî de keyeyê Bozkurtî 1994 de wexto ke dewe amebî vengkerdene, bînaya terikîyaye ya ocaxê weşîye de, dewa Bornekî de cadabi xo. La 25 serran ra dima 25ê hezîrane de cendirmeyan keye bi zorî tîya ra vet.

Elîfe û Mehmet Bozkurt nika kişta ocaxê weşîye de xeymêke de ciwîyenê.  Elîfe û Mehmet Bozkurtî derheqê serebûtî de Ajansê Mezopotamya rê qisey kerd. 

Elîfe Bozkurt pare kerd ke 1994 de ê bi zorî dewe ra ameyî vetene û êyê ke dewe ra nêvejîyayê zî ameyî qetilkerdene. Elîfe vat: ''Layê Roje de înan di keyeyî çin kerdî. Leşkeran bi rojan dormeyê dewe de xeymî nayî ro. Ma dewe de 5-6 keyeyî mendî, dima tedayan ra ma zî dewe ra vejîyayî. Wexto ke ma ameyî Bornek no ocaxê weşîye teriknaye bibi. Awe û ceyran ma ard tîya.  Verî zî cendirmeyan ma tîya ra verbi. O çax zî ma axûr de mendî.

25ê hezîrane de cendirmeyan reyna bi baganeya 'gerre est o' ma vetî. Muxtarê dewe ma mexdûr kerd. Eke muxtar îmza nêdayêne dosyaya cendirmeyan ma tîya de do bimendêne. Seba ke ma eşîrêka cîya ra yê, muxtar ma nêwazeno.  Cendirmeyan ber û pancerayî şikitî ma eştî, eşyayê ma eştî teber.Înan reyna sey verî ma rê zulm û teda kerde. Meaşê ma çin o, na zî xeyma birayê min a. Ma nêwazenê şorê cayêkê bînî. Ma wazenê erdê xo de bimanê.'' 

Mehmet Bozkurtî krîzo ekonomîk vist vîrî û vat: ''Wa ma rê hetkarîye bêra kerdene. Ma nêeşkenê erd û dewa xo ra cîya bibê û şaristanan de biciwîyê. Ma domanîya xo ra nata nê erdî de bîyî. Her kes şoro zî ma do erdê xo war nêverdê û nêşorê.''