Hêrişê DAÎŞî yê 3ê tebexa 2014î yê vera Şingalî de  bi hezaran êzidîyî ameyî qetilkerdene, bi hezaran cinîyê êzidîyî ameyî remnayene û sey koleyan bazaran de ameyî rotene. Bi hezaran êzidîyê ke ameyî qetilkerdene hetê DAÎŞî ra kommezelan de ameyî definkerdene.  Şingal de heta nika 92 kommezelî ameyî vînayene.

Iraqî binê çimdarîya Neteweyanê Yewbîyayeyan de 15ê adara 2019î de dest pê akerdişê kommezelan kerd. La heta nika têna 55 kommezelî ameyî akerdene. Nê mezelan de esteyê hezar û 32 kesanê ke ameyî qetilkerdene ameyî vînayene.

Iraqî cenazayê 242 kesanê ke bi testê DNA ameyî zelalkerdene, teslîmê keyeyanê înan kerdî. Dezgehê Tipê Edlîyî yê Baxdadî de 790 cenazayî est ê ke testê DNA yê înan  ameyî girewtene û yeno pawitene nasnameyê înan  zelal bibê.

Dewanê Qinê,  Herdan û Koçoyî de bi hîrê merasîmanê cîya cîyayan 41 cenazayî ke nasnameyê înan ameyî zelalkerdene û teslîmê keyeyanê înan ameyî kerdene, ameyî definkerdene. Îdarekar û endamê Îdareyê Xoserî yê Şingalî û xeylêk kestî tewrê merasîman bîyî.