Amed de ciwano 17 serre yê bi nameyê Mehmet Okmenî ke Îstanbulî ra seba zîyaretê merdimanê xo amebi, dekewt awa Çemê Dîcle û awe Okmen berd. Dima ke xebere dîyaye AFAD, îtfaîya û Servîsê Lezabezî meyîtê Okmenî çemî ra ame vetene.

Reyna qezaya Farqînî ya Amedî de Veysî Ari (40) seba ke masêyan bitepişo domananê xo reyde nêzdîyê Pirdê Malabadî de şi Çemê Êlihî û semedo ke şeqitîya kewt awe. Dima ke xebere dîyaye AFAD, îtfaîya, ekîpê weşîye û leşkerî ameyî cayê serebûtî. Meyîtê Ariyî 2 saetan ra dima awe ra ame vetene û seba otopsî erşawîya morgê Nêweşxaneyê Dewlete yê Farqînî.

Merdimanê Ariyî vera ekîpa AFADî ya ke seba cigêrayîşê binê awe xebatkarê ci çinbî, nêrazîbîyayîşê xo mojna.