Nêrazîbîyayîşê vera Santralanê Hîdroelektrîkan (HES) dewam kenê ke qezaya Erdîşî ya Gelîya Zîlane de yenê kerdene. Serekê Komeleya ÇEV-DERî ya Wanî Alî Kalçikî îfade kerd ke awa çimeyê cuye seba menfaatan yena bazarîkerdene.

Alî Kalçikî vist vîrî ke awe xoza de bêbedel ameye pêşkêşkerdene pêro gandaran la hêzanê serdestan no heqê gandaran kerd hacetêkê bazirganîye. Kalçikî ard ziwan ke hîşmendîya kapîtalîzmî ra rîyê erdî bîyo gemarin û cuya merdiman rê gef yeno werdene.

Kalçikî da zanayene ke seba peydakerdişê enerjî pê her metodî kapîtalîzm dano çimeyanê xoza ro û bendan dano verê awe.  Kaçikî vat: ''Sey Heskîfê tarîxî ganî bendê nêdê verê Zîlane, ganî xozaya ma, tarîxê ma nêrê qetilkerdene. Kanîya Sipî, Bendê Mahîye û Zîlane nêrê talankerdene. Gelîya Zîlane de tewir bi tewirî gandarê endemîkî estê Ganî her di çimeyê Çemê Zîlanê nêrê gemarîkerdene. Verê cû pê bira mehkeme viraştişê HESanê Zîlane amebi vindartene labelê newe ra bi hawayêkê bêhuqûqî HESî yenê kerdene. Awa xoza ganî nêba keyeyêkê bazirganîye. Zîlane ganî bi hawayêkê azadî bihêrika.''