Rêxistina HDPyî ya Çewlîgî de derheqê qirkerdişanê Helebçe û Gazî de panelêk ame kerdene. Panel de ame vatene ke rixmê heme hêrişan xoverdayîşê şaran dewam keno û semedê tewrbîyayîşê Newroze ame vengdayene.
Rêxistina HDPyî ya Çewlîgî de bi wesîleya Qirkerdişê Helebçe yê 19ê adare ya 1988î û Qirkerdişê Gazî yê 12ê adare ya 1995î panelêke organîze kerd. Hemserekê HDPyî yê Dêrsimî Îbrahîm Kasun û Hemserekê HDPyî yê Çewlîgî Veysel Kaya sey qiseykerdoxî tewrê ci bîyî.
Kasunî ard ziwan ke menga adare hetê faşîstan ra şaran rê bîya menga qirkerdişan û vat: ''Ma sey şarê kurdî tim raştê qirkerdişan ameyî la ma çirey verê înan de çok nêda.''
Kayayî zî ard ziwan ke şarê kurdî tim raştê polîtîkaya asîmîlasyonî yeno ûvat: ''Hêrişo kîmyewî sûcê merdimîye yo la gama ke vera kurdan yeno şuxulnayene dinya çimanê xo qefilnena. Qirkerdişê Helebçe de 5 hezar kesî merdî. Hema zî qijê ke benê astengdar ê. Şarê kurdî rixmê heme hêrişan çirey peyser game nêeşt, xoverdayîşê xo domneno.''
Kayayî semedê tewrbîyayîşê Newroze zî veng da û vat: ''Ma do 20ê adare de Kuçeye Weşîye de saete 11:00 de şayîya Newroze bikerê. Wa ma veng danê ke wa heme şarê Çewlîgî tewrê Newroze bibo.''
