Esnafê Çewlîgî vera Dîyanetî hêrsbîyaye yê

Çewlîg de esnafanê pasajê Camîyê Haci Xidirî newe dikanê xo akerdî. La Weqfa Dîyanetî seba aşmanê bînan zî kîra waşt. Esnafan vera waştişê Dîyanetî nêrazîbîyayîşê xo mojna.

Çarçewa tedbîranê vîrusê Korona de 3 aşman ra nata sey her cayî Çewlîg de zî dikanî girewte bîyî. Dikanan 1ê hezîrane de dest pê karî kerd.

Pasajê Camîyê Haci Xidirî de zî esnafan newe ra dikanê xo akerdî la esnafî rîyê kîra ra mîyanê tengîye de yê.

Esnafan pare kerd ke Weqfa Dîyanetî ya Tirkîya esnafan ra kîraya aşmanê ke dikanî girewte bîyî waşte. Esnafan waşt ke mesele bêra çareserkerdene.

Esnafan da zanayene ke verê cû Dîyanetî vatbi ke ê do kîraya nê aşman do nêgêrê la 1ê hezîrane de cade mesaj şawit ke kîrayî bêrê dayene.

Esnafan ra Mujdat Çakmakî vat: ''Dîyanetî verê cû vatbi ke ê do kîra nêgêrê la nika wazenê. Dikanê ma 3 aşman ra nata girewte yê. Mi înan rê vat ke qaşo no dezgeh wijdan û exlaq temsîl keno. La şima senî eşkenê ke ma ra kîra biwazê. Na kîra helal a yan zî heram a.''

Esnafê bînî yê bi nameyê Onur Aşanî zî wina qisey kerd: ''Dîyanet ma ra kîraya 3 aşman wazena. Yanî ganî ma wextêk têna înan ra do kar bikerê. Wijdan û exlaq de cayê ney çin o. Dîyaneto ke Îslam temsîl keno ganî bi hawayêkê hesasî nêzdîyê na mesele bibo. Seba ke ma mexdûr nêbê ganî na mesele bêra çareserkerdene.''

Ame parekerdene ke ceyranê esnafan zî seba ke faturayî nêdayî birîya.