Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindir semedê têhetameyîşê ''Wextê Azadîye'' şîyî Çewlîg. Kuçeyanê Çewlîgî de sloganê ''Ma do pê xoverdayîşî ser bikewê'' bîyî berz.
Hemsereka Pêroyî ya HDPyî Pervîne Buldan û Hemserekê Pêroyî yê DBPyî Keskîn Bayindirî çarçewa Kampanyaya ''Wextê Azadîye'' de şîyî Çewlîg.
Hemserekî hetê wekîlanê HDPyî yê herême îdarekaranê bajarî ra meydanê teyarayan ê Çewlîgî de pê vilikan ameyî verwazîkerdene û bi konvoyêk şîyî merkezê bajarî. Buldane û Bayindir verê têhetameyî merkezê bajarî de şarî reyde ameyî têhet û esnafî zîyaret kerdî. Kuçeyanê Çewlîgî de sloganê ''Ma do pê xoverdayîşî ser bikewê'' bîyî berz.
Ciwananêke Kuçeyê Înonu de heyetî reyde rayra şîyêne pankarta ''Tecrîd sucê merdimîye yo, tepişteyê sîyasîyî rûmetê ma yê, HDP her ca de yo'' akerde û bale ante tecrîdê serê Rayberê Şarê Kurdî Abdullah Ocalanî ser.
Hemserekê HDP û DBPyî badê zîyaretê esnafî şîyî banê HDPyî yê bajarî. Hemserekî verê banê partîye de xîtabê şarî kenê.
