Qezaya Kanîreşî ya Çewlîgî de warê mabênê dewanê Eynik û Qizilaxaçî de daristananê Karacehenemî de 6ê teşrîna verêne ra nata darî bi bahaneya 'asayîşî' birîyenê.

Mudirîya Karanê Daristanan îdîa kerdbi ke darî 'semedo ke gandar û ciwan bibê birîyenê.' La dima bi dîmenan eşkera bi ke darî birîyenê û pê kamyonan kirişîyenê.

Dewa Qizilaxaçî ra Mehmet Kulî pare kerd ke leşkeran înan rê vato darî semedê asayîşî birîyenê û ê do destûr medê ke dewijî şorê daristanan. Kulî vat: ''Leşkeran vat eke ma şorê warê daristanan mabênê ma û hêzanê fîrmaya mutahîdî de mesele virazîyena.''

Muxtarê dewa Qizilaxaçî Selahattîn Borî vat: ''Ma sey heyetêkî Mudurê Karanê Daristanan Îbrahîmî reyde qisey kerd. Ey vat semedê gandar û weşkerdişê daran na xebate kenê. La dima ma dî ke pê kamyonan darê ma kirişîyenê. Ma nêzanenê ha se bena.''

Serekê Komeleya Dormeyî ya Çewlîgî Cuma Karaaslanî vat: ''Darî birîyenê, pê kamyonan kirişîyenê. Kontrolê nê birnayîşî zî nêno kerdene. Weşkerdişê daran zî bibo no qestî ra yeno kerdene. Tîya de ekosîstemêko xozayî esto û hewceyê weşkerdişî çin o. Xora mazêrî darê winasênî nîyê ke hewceyê ci pê weşkerdişî bibê.''

Nameyê mutahîdê raştikênî yeno nimnayene?

Çewlîgijan bale ante ser ke îhaleya birnayîşê daran dîyaya muxtarê dewa Talvarî Tayyîp Bulak û embazanê ci yê qoricîyan.

Dewij Metîn Çelîkbîlekî derheqê babete de vat ke muxtar Tayyîp Bulakî înan rê vato 'mutahîdê nê karî ez a.' Selahattîn Borî zî derheqê babete de wina vat: ''Bulakî pêvînayîşê ma yê bi leşkeran de vat ke ey îhale girewte û semedo ke ma ra bêxebere wina kerd uzrê xo waşt.''

La hetê bînî ra Wekîlê HDPyî yê Çewlîgî Erdal Aydemîrî zî bale ante ser ke nameyê Tayyîp Bulakî semedê xapînayîşê şarî nusîyayo û vat: ''Wina vajîyeno ke îhale hetê Tayyîp Bulak û embazanê ci yê qoricîyan ra ameya girewtene.''

Walîtîya Çewlîgî verî bi eşkerayîyêke îdîa kerdbi ke xebera dewijan pê birnayîşî esta la dima vejîya werte ke dewijî heta roja verêne ya birnayîşî pê îhale nêhesîyayî.

Serekê Komeleya Dewan Eynik û Qizilaxaçî yê Kanîreşî (AYKI-DER) Fatîh Borî vist vîrî ke înan sey dewijan îmzayî arê dayî û vat ke ê nêwazenê darî birîyê. Borî vat: ''Ma selahîyetdaran ra wazenê ke wa cewab bidê nê persanê ma; çira herinda Fatîh Kavalarî de nameyê Tayyîp Bulakî yeno vejîyene vernî, eşkerayîyê selahîyetdaran çira yewbînan nêtepişenê, rixmo ke dewijî nêwazenê çira darî bi lezî birîyenê? Ma selahîyetdaran ra wazenê ke cade nê birnayîşê daran vindarnê.''