Fermandara Qerargehê Merkezî yê YJA-Starî Zozane Çewlik Hemleya 15ê Tebaxe ya ke Roşanê Gandarbîyayîşê Kurdan o ANFyî rê ercnaye.

Qiseykerdişê Zozane Çewlik ra beşêk wina yo:

''Embaz Egîd (Mahsûm Korkmaz) xeta Rayberîye asta berze de fam kerde, fermandarî û rayberîya Hemleya 15ê Tebaxe kerde. Fermandar Egîd bi vengê hayabîyayîş û xoverdayîşê şarê kurdî, bi şimşêro tûj ê kurdan.

Nê esasî ser o ez Roşanê Gandarbîyayîşê Kurdan ê 15ê Tebaxe sere de rayber Apoyî rê, gerîlayan rê, milîtananê Apoyî rê, şarê kurdî rê û merdimîye rê fîraz kena. Ez şexsê Fermandar Egîdî de pêro şehîdanê têkoşînê azadîye bi minet û hûrmetî yad kena.

Kurdîstan bi serran ame parçekerdene, kolonîkerdene û asîmîlekerdene. Na mesele Rayber Apo û têgêrayîşê PKKyî vetî werte. Nê esasî ser o Hemleya 15ê Tebaxe. Coka Hemleya 15ê Tebaxe seba şarê kurdî, şaranê bindestan û cinîyan bi dewreko newe. Guleyo verên bi rîpelo verên ê tarîxê azadîya cinîyan û kurdan. No gule vera asîmîlasyon û seba wayîrvejîyayîşê nasname, tarîx, welat û estbîyayîşê kurdan bi. Eke kurdî ewro eşkenê estbîyayîşê xo bipawê ê deyndarê têkoşînê Rayberîye, şehîdan ê. Hişmendîya ke guleyê 15ê Tebaxe rê şikl da îdeolojî û paradîgmaya Rayberîye yê.

Mîyanê PKKyî de cinîyan zereyê şorişî de şoriş kerd. Xora ma na babete de deyndarê Rayberîye û şehîdan ê. Hemleya 15ê Tebaxe reyde cinîyan rayberîya Sara, Besê Anuş, Rahîme kahraman, Azîme Demîrtaşan de vat ke nê şerî de ma zî estê. Ewro zî cinîyê kurdî esasê îdeolojî û felsefeya Rayberîye de wayîrê nasname û kesayetêkî yê. Ma erjanê 15ê Tebaxe ser o gerîlatîya cinîyan, fermandarîya cinîyan, artêşa cinîyan û konfederalîzmê cinîyan aver berdî. Nika artêşa cinîyan û partîya cinîyan esta. Nê averşîyayîşan serdestîya camêrdan de qewimîyayîşê pîlî viraştî.

Têkoşînê ma yê azadîya cinîyan hîşmendîya cinîya azade awan kerde ke no tarîx de reta verêne qewimîyabî. Artêşbîyayîşê cinîyanê Kurdîstanî hem Rojhelatê Mîyanênî de hem zî pêro dinya de yew bi. Cinîyan pê wayîrvejîyayîşê xorêxistinbîyayîş û xohîşmendîye Bêrîtan û Zîlanî vetî werte. Ewro cinîya kurde pêro dinya de bale ancena xo ser. Ewro sey hêzanê YJA-Starî wezîfeyê ma yo verên o ke ma wayîrê mîras û xeta Hemleya 15ê Tebaxe vejîyê. Ma sey hêzanê YJA-Starî û HPGyî tecrube û îlhamê xo tarîxê xo ra gênê.

Sere de Vakurê Kurdîstanî pêro parçeyanê Kurdîstanî de artêşa tirke ya îşxalkere, hêzê faşîstî yê paramîlîterî û hemkarê bêbextî vera têgêrayîşê ma hêrişanê qirkerdişî kenê. Ewro çarçewa Hemleyanê Bazanê Zagrosî û Cengê Xabûrî de gerîlayî têkoşîn kenê û xo ver danê. Gerîlayî pê ruhê 15ê Tebaxe erjanê kurdan pawenê û kenê ke têkoşîn biresnê serfîrazî.  Sey YJA-Starî sebebê ma yê têkoşînî caardişê azadîya Rayberîye û awankerdişê komelê azadîwaştoxê cinîyan û ekolojîk o. Ma do hêrişanê îşxalî yê dewleta tirke berteref bikerê û vera serdetîya camêrdan heta peynî têkoşîn bikerê. Ewro şero ke ma Zagrosan, Zap, Metîna û Avaşîn de kenê, azadîya pêro şaran ê bindestan, şerê pêro cinîyan o.

YJA-Star gerîlatîya dewrê neweyî de safhayêka pîle viste destî. Xoverdayîşanê Bazanê Zagrosî û Cengê Xabûrî de rayberîya Amara Goyî, Ronahî Xelîla, Ekin Tilora, Dorşin Amara, Asya Kerim, Melsa Derik, Delal Dilxweş, Viyan Botan, Diyana Maria, Ruken û Saryayan de şehîd bîyî. Nê embazî bêteredut tewrê servistişê Hemleya 15ê Tebaxe bîyî. Mesuldarîyê ma yê esasî yê ke ma Rayberîya xo azad bikerê, hêrişanê îşxalî bin bikerê û erjanê ma bipawê. Şexsê Fermandar Egîdî de ez pêro şehîdan bi minetî yad kena û soz dana ke ma do bibê layîqê şehîdan, pratîkê înan pê serfîrazîye tacîdar bikerê.''