Roje bi roje hûmara komeleyanê eşîranê ke hetê dewlete ra yenê fînansekerdene zêdîyenê. Hûmara komeleyanê eşîran ê Wanî resaye 20. Temsîlkaranê eşîranê Wanî bi nameyê Komeleya Pêkerdiş û Haştîye ya Komelkî û Federasyonê Eşîranê Kanan ronîyayîş îlan kerd. Walî, qeymeqamî û burokrasîyê dewlete zî beşdarê bernameyê ronîyayîşî bîyî. 

Wekîlê Partîya Çep a Keske yê Wanî Sînan Çîftyurekî derheqê babete de ANFyî rê qisey kerd.

Çîftyurekî pare kerd ke eqsê qiseyê walîyê verênî yê Wanî eşîranê kurdan tim paştî nêdaya dewleta tirke. Çîftyurekî vat: ''Dewlete eşîran fînanse kena. Dewlete bi nê hawayî kena ke eşîrî semedê pereyî bikewê pê û binê kontrolê ci de bibê. Verê cû axayan kamyew partîye nîşan dayêne şarî raya xo dayêne ci. La nika wextê axayan qedîyayo. Hînî dewlete nêeşkena eşîran îqna bikerê ke qoricî bibê yan zî raye bidê. Dewlete nika bi rayîrê fînansekerdişê komeleyanê eşîran nê çî kena. Dewlete kena ke verê parçebîyayîşê eşîran bigêra. Dewlete meseleya kurdan de bêçare ya. Dewlete sîstemê eşîran de israr kena û no zî verê roşnîbîyayîşî gêno.''

Çîftyurekî ard ziwan ke Wan herêma Serhedî de sey baregehî ameyo weçînayene û vat: ''Vakurê Kurdîstanî de dewlete Wan sey herêma pîlot weçînayo. Çunke serebûtê Wanî do tesîrê Riha û Amedî zî bikerê. Yanî tesaduf nîyo ke seba komeleyanê eşîran Wan ameyo weçînayene. Hetê bînî ra Wan mîyanê hîrê parçeyanê Kurdîstanî de yo. Wan Rojhelat, Vakur û Başûrê Kurdîstanî girê dano pê. Coka dewlete giranîye dana Wanî. Seba ke Wan hetê ekonomî û kulturî ra apey bimano dewlete her çî kena. Dewlete wazena eşîrîye dewam bikera ke wa şar binê kontrolê ci de bimano.''