Çarçewa Kampanyaya Wextê Azadîye de Êlih de hetê KCD, TJA, DBP û HDPyî ra ame mîtîng ame kerdene. Mîtîngo ke Warê Newroze ame kerdene pê rêzgirewtişî dest pêkerd.

Bi hezaran kesanê ke kincê neteweyî kerdî piray verê xo da warê mîtîngî û govende girewte. Mîtîng de sloganê sey ''PKK şar o, şar tîya de yo'', ''Biciwiyo Rayber Apo'', ''Cinî cuye azadîye'' ameyî eştene.

Verî bi nameyê Komîteya Amadekerdişî Hemserekê HDPyî yê Bajarî Omer Kulpuyî qisey kerd. Kulpuyî semedê tewrbîyayîşî mîtîngî şarî rê spas kerd, Roşanê Ganîbîyayîşî pîroz kerd û xoverdayîşê Îmrali û zîndanan selam kerd.

Hemserekê Pêroyî yê DBPyî Keskîn Bayindirî bale ante hêriş û zextê hukmatî yê vera kurdan ser û vat: ''Zîhnîyetê AKP-MHPyî ça de yew qezencê kurdan esto hêrişê ci keno. La kurdî çar leteyanê Kurdîstanî de semedê statuyî, semedê azadîye xover danê. Kurdî statu, azadîye û ziwanê xo yê dayîkê wazenê û ewro hinî eşkenê înan dest bifînê. Pê têkoşînê seserran ma azadîye rê bîye nêzdî. Ewro ma merhaleyêka krîtîke de yê hetêkî ra îmha û înkar hetê bînî ra azadîye û serkewtiş esto. Ewro roja azadîye ya. Êlih nîşanê sekewtişî dano. Kurdîstan nîşanê azadîya Rayber Apoyî dano.''

Dima ra Hemsereka Pêroyî ya HDPyî Pervîne Buldane qisey kerd. Buldane vat: ''No welat hewceyê haştîya komelkîye yo. Ma semedê nayî têkoşîn kenê. Semedê haştîya komekîye ganî kurdî ziwan, nasname û kulturê xo rehat bişuxulnê. Elewîyî goreyê dînê xo îbadet bikerê. Zîhnîyeto ke dişmenîya kurdan keno ma ey nasnêkenê. Ma sey HDPyî wazenê ke meselaya kurdî wa pê metodanê demokratîkan bêro çareserkerdene. Heta ke meselaya kurdî çareser nêbo azadîye, edalet, huquq do çirey nêrê. Semedê çareserîye ganî Abdullah Ocalanî reyde pêvînîyaşî bêrê destpêkerdene. Tecrîd nêno qebulkerdene. Wa tecrîd bêro wedaritene û pêvînayîşî bêrê kerdene. 20 serrî yo no welat rîyê îqtîdarê AKPyî ra dej anceno la hinî wextê înan bîyo de. Şar do vîjnayîş de înan ra xo bixelisîno.''

Mîtîng badê qiseykerdişan pê slogan û tîlîlîyan qedîya.