Colemêrg û qezayanê ci de bêkarîye se ra 85 a. Krîzê ekonomîkî û janî ra roniştoxê Colemêrgî zêdêr xizan bîyî. Ciwanê ke nêeşkenê Colemêrg de karêk bivînê koçê Wanî û şaristananê bînan kenê.

Colemêrg de her serre bi desan kesî dezgehanê ÎŞKURî de dest pê karî kenê. Nê kesî bi temamî ya qoricî yê yan zî terefgîrê AKPyî yê. Roniştoxê herême zî pê rewşe qayîl nîyê û tim nêrazîbîyayîşê xo anê ziwan.

Cuneyt T. yo 28 serre vano o bêkar o û her serre seba karî muracatê ÎŞKURî keno. Cuneyt T. pare kerd ke her serre heman çi beno û terefgîrê AKPyî tewrê karî benê. Cuneytî vat: ''Êyê ke tewrê karî benê ya terefgîrê AKPyî yê yan zî qoricî yê. Rixmo ke karê înan esto reyna zî ÎŞKUR kar dano ci yanî di meaşan gênê. Roniştoxê şaristanî zî bêkar ê.''