Îdarekarê verênî yê MÎTî Mehmet Eymurî kanala televîzyonî T24 de Gokçer Tahîncîogluyî rê qisey kerd. Eymur xebere de sey 'xebatkarê îstîxbaratî yê girîngî' ame pênasekerdene.

Eymur û Mehmet Agar zî tede 19 kesî newe ra derheqê 18 cînayetanê meçhûlan ê serranê 90an de dewa de yenê muhakemekerdene.

Eymurî xebere de îtîraf kerd ke Mahmut Yildirimo ke pê nameyê qodî yê 'Yeşîl' şinasîyeno hetê kesêkî ra semedê pereyî kişîyayo û vat: ''Xeylêk kesan o şuxilnabi.  Sebeb çin o ke o ma ra biremo.'' Eymurî îtîraf kerd ke serekanê JÎTEMî ra Cem Aysever zî hetê Yeşîlî ra kişîyayo.

Eymurî vist vîrî ke Korkut Ekeno ke 18 cînayetan ra yeno muhakemekerdene ser o vat: ''Dewlete raşta zî 18 kesî kiştî. Na dewa bi îfadeyê Ayhan Çarkinî ameye kerdene. Dewlete eşkena her çi bikera. No meşrû yo. La eke mîyan de menfaat estbo. La ê merdimî semedê pereyan bi gefê 'Hende pere bide mi nêbo ez to kişena.' kişîyayî.''

Eymurî pare kerd ke serekwezîra ê çaxî pê hayîdar bibî ke mabênê Mehmet agar û Abdullah Çatliyo ke dewlete semedê sûcî o xebitna de têkilîye esta. Eymurî îdîa kerde ke dima ke karê MÎTî pê nê kesan qedîyayî bîyî koma Agarî û vat: ''Hayîya Çîllere pê nê cînayetan estbî la kam zaneno Agar senî vano? Agar pasaport û selahîyet danê nê kesan.

Dogu Perînçek merdimê îstîxbaratê Îngilîstanî û Amerîkanî yo. Merdimê Perînçekî mîyanê MÎTî de yê, mîyanê artêşe de yê û bîyî general zî. Perînçek semedo ke verê çepgîrîye bigêro ame wezîfedarkerdene. Amerîka Tirkîya kewte xeylêk cayan. Heyf ke ma nêeşkenê binê tesîrê ney ra vejîyê.''