Avûkat Bekîr Kaya weçînayîşê herêmî yê 29ê adara 2009î de sey hemşaredarê Wanî amebi weçînayene. Serra diyîne ya wezîfeyê xo de de wextê erdlerzî yê Wanî de pê 'operasyonanê KCKyî' ame destbendkerdene, 17ê hezîrana 2012î de zî ame tepiştene. îdîanameyê Serdozgerîya Komare ya Wanî de ame îdîakerdene ke serra 2011î de wextê çalakîyanê şermezarkerdişê YSKyî de bînayê umûmîye pê molotofan vêşîyayî û Kayayî zî nêverd ke îtfaîyayî şorê nê bînayan.

Roniştişê serra 2013î de eşkera bi ke dîmenê ke seba îdîa ameyî pêşkêşkerdene, montaj ê. Mehkeme rixmê ney zî Bekîr Kaya, Cuneyt Caniş, Nezahat Erguneş, Halîs Çakir, Metîn Adûgît, Mîhrîban Şah, Mûrat Dûrmaz û Velî Avci rê cezaya zîndanî ya 8 serr û 9 mengan, Îhsan Guler, Abdulkerîm Sayan û Mehmet Şîrîn Yildiz û Dervîş Polat, 6 sal û 3 meh jî li Hecer Sarîhan rê zî cezaya zîndanî ya 6 serr û 3 mengan daye.

Dima ke sûcdarîyê derheqê Bekîr Kayayî de ameyî pûçkerdene, serra 2014î de newe ra seba hemşaredarîye ame weçînayene. Labelê 17ê teşrîna peyêna 2016î de reyna 'Dewaya KCKyî ya Wanî' ra Kaya ame tepiştene û herinda ci de qeyûm ame tayînkerdene. Ame îdîakerdene ke Bekîr Kaya wextê çalakîyanê Kobanê de sey protestoyê YSKyî nêverda ke îtfaîyayî debikewê şaristan. Bekîr Kayayî rê cezaya 8 serr û 3 mengan ameye dayene.

Wextê roniştişanê dewa de Wezaretê Karanê Zereyî mufetîşêk wezîfedar kerd ke mufettîşî îfadeyê Kaya, endamanê Komîsyonê Îmdatî Cahît Bozbay, Giyasettîn Gultepe û Ayşane Harmanci girewtî. Raporan û peyê nê îfadeyan ra dima nêame îsbatkerdene ke Hemşaredar Kaya PKKyî reyde têkilîyêke ronaye yan zî eleqeyê înan esto. Dima Wezaretê Karanê Zereyî pare kerd ke îdîayê ke Bekîr Kaya û endamê Komîsyonê Îmdatî pê yenê sûcdarkerdene raşt nîyê û destûrê cigêrayîşî nêda.