Şikefteyêkê deweka Libka Kanîya yê dewa Derêca yê qezaya Kerboranî yê Mêrdînî de gorêko komkî amebi dîyene. Şubeyê ÎHDyî yê Mêrdînî derheqê şikefteyî de raporê xo eşkera kerd.

Rapor de nê çîyî ameyî vatene: ''Hemwelîyê ma yê bi nameyê Îrfan Yakutî şikefte de gorêko komkî dî û bi armancê ke beno ke esteyê  babîyê ci yê vînbîyayeyî zî tede yo Serdozgerîya Komare ya Kerboranî rê pê telefonî zanayîş da.''

Heyetê ÎHDyî zî waştişê Yakutî ser o şi cayê serebûtî la bi bahaneya ke derheqê tehqîqatî de bira nimitke esta heyet ame astengkerdene.

Şubeyê Mêrdînî yê ÎHDyî ard ziwan ke Serdozgerîya Komare têna 5 deqayan derheqê babete de zanayîş da. Heyetî raporê xo de nê tesbîtî kerdî:

''-Seba agahdarkerdişê rayaumûmîye, astengkerdişê xebata rêxistinêka sivîle seba silametîya tehqîqatî asteng o.

-Sey avûkat û  temsîlkaranê rêxistina sivîle ma qerqilîyenê ke tehqîqat û roşnkerdişê serebûtî pê silametîye nênê kerdene.

-Dozgerîye nêverda ke ma sey heyetî cayê serebûtî de cigêrayîş bikerê û delîlan kom bikerê. Ma na babete ser o zî qerqilîyenê.

-Heyetê ma şahîdê ci bi ke Serdozgerîya Komare ya Kerboranî komkerdişê delîla de goreyê Peymana Minnesota ya Neteweyanê Yewbîyayeyan tênêgêraye.

-Her este seba merdimanê vînbîyayeyan hêvîyêk o. Na hêvî rîyê testanê DNA yê Dezgehê Tipê Edlîyî ra rastê brukrasî yena û erey netîce bena. Ganî Dezgehê Tipê Edlîyî keyeyan mexdûr nêkero û testê DNA cade bêrê zelalkerdene.

-Seba ke vînbîyayeyî lez bêrê dîyene û berpirsîyarê ci bêrê dîyene û hukmkerdene ganî kar û gureyê tehqîqatî cade bêrê kerdene û netîce bêra girewtene.

-Bira Serdozgerîya Komare ya ''nimitke'' ya seba cigêrayîşî û astengkerdişê heyetê ma vera cigêrayîşê edîlanî yê. Ma sey Şubeyê ÎHDyî do derheqê babete de muracatê xo bikerê.''