Şubeyê Amedî yê Komeleya Heqanê Merdiman (ÎHD) derheqê reşa tepişteyan ê nêweşan de eşkerayîyêke weşanaye.

Eşkerayîye de wina ame vatene: ''Şafîî Haymeyo ke 1ê hezîrana 2020î de muracatê komeleya ma kerd, pare kerd ke wasîyê ci Soydan Akay 27 serrî yo ke zîndan de yo, serra 2018î ra nata zî tedawîya kanserê prostatî vîneno û tede romatîzma, Hepatît B û spazmê qelbî zî estê. Soyadan di serran ra nata Zîndanê Sîlîvrî de hucreyê yewkesî de maneno û tedawîya ci nêna kerdene. Soydanî 6 mengî yo ke heqê xo yê telefonî û pêvînayîşî zî nêxebitna.

Têna serra 2019î de zîndananê herême de 9 tepişteyê nêweşî merdî. Menga gulana 2020î de Zîndanê Osmanîye de Sabrî Kaya, Zîndanê Edîrne de Vefa Kartal nêweşîye ra merdî. Goreyê doneyanê ma 1334 tepişteyê nêweşî estê û rewşa 458ê nînan giran a.

Ma wazenê ke tedawîya Soydan Akayî bêra kerdene û eke zerarêk bireso rewşa ci ser berpirsîyar Wezaretê Edaletî yo.''

ÎHDyî da zanayene ke ganî nê gamî bêrê eştene:

-Tepişteyê nêweşê giranî ganî cade bêrê veradayene, tedawîya înan hetê keyeyê înan de bêra kerdene û dewlete sîgortaya înan a weşîye bida.

-Têna Dezgehê Tipê Edlîyî derheqê weşîya tepişteyan de bire nêdo.

-Bira taloqkerdişê înfazê ceza yê seba meseleyanê weşîye goreyê raporanê nêweşxaneyan wa bêra dayene.

-Şertê 'seba asayîşê komelî tehluke yo/ya' verê taloqkerdişê cezayanê tepişteyan ê nêweşan de asteng o, ganî no şert qanûnî ra bêro vetene.

-Bendê 16. yê madeya 107î yo ke verê taloqkerdişê înfazê ceza de asteng o, wa bêro wedaritene.

-Goreyê bira Mehkemeya Heqanê Merdiman a Ewropa ya derheqê Kaytan-Tirkîya de ganî tepişteyê nêweş û kokimî û nêweşî bêrê veradayene.

-Ganî bero zanayene ke nêverdayîşê tepişteyan ê nêweşan madeya 3. ya Peymana  Heqanê Merdiman a Ewropa binpay keno.