Mehmet Îldem Adana de 1993 de amebi tepiştene û 30 serran ra dima Zîndanê Burhanîye ra vizêr vejîya. Îldemo 65 serre ewro şi şaristanê xo Mêrdîn. Torn û merdimanê ci, îdarekaranê TUHAY-DER, DEM Partî û DBPyî Îldem meydanê teyarayan de pêşwazî kerd. 

Girseyî bi vilan û çepikan Îldem pêşwazî kerd. Îldemo ke tornê xo dî berma. Tornanê ey tîzbeyêk dîyarîya Îldemî kerd.

Îldemî merasîmê pêşwazîkerdişî de qisey kerd û vat: ''30 serran ez zîndan de menda la seba azadîya şarê kurdî no zî kêm o. Ma çendek zîndanan de bimanê zî ma rê mesele nîya. Ma peynîya peynî de do zîndanan ra vejîyê. Ez poşman nîya. Heta peynî ma do nê rayîrî ra şorê.''

Îldem dima girseyî reyde şi taxa Aluca ya qezaya Rişmîlî ya herêma Omerîya. Tîya de zî dewij û merdimanê ci Îldem pêşwazî kerd.