Wekîlê HDPyî yê Êlihî Necdet Îpekyuzî xespkerdişê şaredarîyan û kerdişê qeyûman ANFyî rê ercnayî.

Îpekyuzî ard ziwan ke îqtîdarê AKP-MHPyî her wext vera şarê kurdî dişmenîye keno û vat: ''Serra 2016î de 102 şaredarîyî ameyî xespkerdene. Ma pê ked û xebatêka pîle nê şaredarîyî qeyûman ra pak kerdî. La heman dişmenîye nika zî dewam kena. Pê şaredarîyanê Îdir, Sêrt, Misirc, Xana, Hawêl û Vartînîsî bi temamî 44 şaredarîyê ma ameyî xespkerdene. Qeyûm rayîro newe yê bêhuqûqî, zulm û îqtîdarî yo. No îqtîdar rejîmê darbe yo. Darbekerî dişmenê şarê kurdî û îrade yê. Heta nika hêrişêk nêeşkîya îradeyê şarê kurdî bişikno. Naye ra pey zî verê îradeyê şarî de hêzêk nêeşkeno vindero. ''

Wekîl Îpekyuzî vist vîrî ke AKPyî jan sey firsendêk xebitna û şaredarîyanê HDPyî şarî reyde vera vîrusê Korona xebatê pîlî kerdî. Îpekyuzî vat: ''Qeyûmî nêeşkenê hewcedarîyanê şarî peyda bikerê. Mîsal Şaredarîya Êlihî xizmêtê pîlî dayêne. Qeyûmî ra dima şaristan de waqayê vîrusê Korona zêdîyayî. Çunke qeyûm tedbîr nêkeno, o û terefgîrê ci ewnîyenê keyfê xo. Verê cû zî kerdişê qeyûman hetê hemşaredaranê ma ra ameybî eşkerakerdene.''

Îpekyuzî da zanayene ke înan vera Korona vilawekê kurdkî vila kerdî. Îpekyuzî bale ante ser ke îqtîdar seba ke wezîfedarêkê AFADî Erdlerzê Xarpêtî de kurdkî qisey kerd propaganda keno la 15ê Gulane Roşanê Ziwanê Kurdkî de şaredarîyî xesp kerdî. 

Îpekyuzî vat: ''Ganî weçinîtoxê HDPyî zêdêr wayîrê partîya xo bivejîyê. Kongre de seba ke tewrbîyayîşê şarî asteng bikero çita kerd ma dî. La şarê kurdî û zerrîwazê HDPyî meydan de bîyî. Merdimî ma rê vanê 'Şima şar ê, se beno wa bibo ma hetê şima de yê.' Ma zî dewma bikerê ke raştîyan bîyarê ziwan. Têkoşînê ma heta ke hemşaredarê ma abigêrê wezîfeyanê xo ser do dewam bikero.  Îqtîdar do qet Kurdîstan de ser nêkewo. Bêrê ma şorê weçînayîş. Partîyê sîyasîyî, roşnvîrî, hunermendî, nuştoxî, dezgehî, rêxistinê komelê sivîlî ganî vera îqtîdarî vengê xo vejê û vajê bes. Ewro roje roja paştdayîşî ya. Bêrê ma pîya vengê xo berz bikerê û vera zorbazîye têkoşîn bikerê.''