Kurdîstan û Tirkîya de tedayê vera rojnamegerîye her roje zêdîyena. Hemserekê Komeleya Rojnamegeran a Dîcle Firatî (DFG) Serdar Altanî teda û zorbazîya vera rojnamegeran û rewşa çapemenîye ya Tirkîya ercnayî.

Hemserekê DFGyî Serdar Altanî vat: ''Çend serrî verê cû wextê Rewşa Îstîsnayîye de îqtîdarî çapemenîya kurdan û mexalîfe werte ra wedarite û pêro berê înan mor kerdî.  Îqtîdar wazeno çapemenîyêka yewvenge biaferno. Pê teda û zorbazîye îqtîdar wazeno rayaumûmîye xebere, serebût û qewimîyayîşan ra agahdar nêbe. Bi seyan rojnamegerî zîndanan de yê, reyna her roje rojnamgerî yenê destbendkerdene û hukmkerdene. Rojnamegerê ke teber de xebitîyenê zî rastê tedayan yenê. Çend rojî verê cu dewaya Azîz Oruç estbi, heyfo ke nêame veradayene. Ma her menge raporê xo pêşkêş kenê û vînenê ke tedaya vera rojnamegeran zêdîyaye. Kurdîstan de zî rewşe giranêr a. Eke operasyonêkê qirkerdişê sîyasî bêro kerdene cara rojnamegerî zî ci ra barê xo gênê. Wazenê rojnamegerî bêveng bimanê.

Tirkîya de 600-700 kanalê TVyî estê û înan ra 98î aîdê AKPyî yê û tim propagandaya AKPyî kenê. RTUK vera ceza dano kanalanê muxalîfan. Çapemenîye hawuzî û dezgehê taybetî bêexlaqîyêka pîle kenê. Serê sibayî ra heta şanî muxalafet ser o nîqaşan kenê la muxalafet uja de nîyo. Mîsal vanê ma HDPyîjan nêvejenê ekrananê xo. Karê çapemenîye karêko fîraz o. Mîsalê Tirkîya dinya de çin ê.''