Îqtîdarê faşîstî dest na Şaredarîya Saricanî ser
Îqtîdarê AKP-MHPyî Şaredarîya HDPyî ya Saricanî rê qeyûm tayîn kerd. Hemşaredarê Saricanî zî vizêr ameybî destbendkerdene.
Vizêr Hemşaredarê bajarekê Saricanî yê qezaya Depe yê Xarpêtî Bekîr Polar û Canane Tagtekîn ameybî destbendkerdene. Ewro zî hemşaredarî wezîfeyanê xo ra ameyî girewtene û herindan înan de walîyê Xarpêtî Erkan Kaçmaz sey qeyûm ame tayînkerdene.
HDPyî weçînayîşê 31ê adare de 65 şaredarîyî vistbî destî. Nînan ra 46 şaredarîyî ameyî xespkerdene, 6 hemşaredaran rê zî pê bahaneya KHKyî mazabata nêameye dayene.
