Serkêşîya Komeleya Paştdayîş û Hetkarîye ya Alîmanê Amedî de Konferansê Îslamê Demokratîkî ame kerdene. Kurdîstan û Tirkîya ra xeylêk alîmê dînî, temsîlkarê rêxistinê komelê sîvîlî û partîyanê sîyasîyan û akademîsyenî tewrê ci bîyî.

Alîmê dînî û akademîsyenê ke tewrê Konferansê Îslamê Demokratîkî bîyî, ANFyî rê qisey kerd.

Fedil Bedirhanogluyî ard ziwan ke dînê îslamî hetê îqtîdaran ra yeno şuxulnayene û vat: ''Dewlete serê dînî ra xo hêzdar kena û waştişanê xo wina ana ca. Dînî goreyê menfeatê xo şuxulnenê. Bi şuxulnayîşê dînî zafêr neheqîye kenê. Kam ke yewîya kurdan wazeno û semedê nê têkoşîn keno ganî paştî bidîyo ci ke verê nê zûlmî bêro girewtene. Eke kurdî mebê yew dahîna zaf raştê neheqîye û zulmî yenê.''

Endama Komîsyonê Bawerîyan û Heqan a DEM Partî Hatîce Şeker zî nê vatî: ''Gama ka ma ewnîyenê tarîxê Îslamî û verê ci ra figurê Hz. Ayşe, Hz. Zeynep, Hz. Hatîce û Hz. Meryeme vejîyenê verê ma. O dewr û ê şertan de nê cinîyan komelî rê serkêşîye kerda. Wextê peygamberîya Hz. Muhammedî de tewr zaf Hz. Hatîce paştî dayo ci. Nê hetî ra cayê cinîyan dînê îslamî de zelal o. Ewro dînî vera cinîyan şuxulnenê. Ma nê qetî qebul nêkenê.''

Hemserekê Pêroyî yê Partîya Azadîye Ayettulah Aşîtî zî wina qisey kerd: ''Armancê û hedefê dînî yo esasî azadîya însanan a. Însan bi îradeyê xo beno însan. Dîn zordarîye nîyo la Rojhelatê Mîyanênî û heme alemê îslamî de dîn sey hacetê zordarîye yeno şuxulnayene. Dîn têna roje û nimaj nîyo. Dînê îslamî wazeno ke heme însanî pîya bi rumetê xo biciwîyê. Çi heyf ke îqtîdarî dînî goreyê menfeatê xo şuxulnenê. Ewro her mezheb, îdeolojî û tarîkqat dînî goreyê xo şuxulnenê. No xelet o.''

Hemserekê Komeleya Elewîyanê Demokratîkan Pir Zeynel Kate zî nê vatî: ''Dewletan fehmê îslamîyetî manaya ci raştî ra fîna dûrî. Tirkîya de kurdî û elewîyî bi nasname û bawerîya xo nînê qebulkerdene. Roja ma de êyê ke bi nameyê îslamîyetê têgêrenê cinîyê êzidîyan berdî bazaran de bi tekbîran rotî. Nasnameyê bînî raştê qirkerdişan yenê. Çîyê winayênî bi îslamê îqtîdarî yenê kerdene. Coka ganî pênaskerdişê îslamê demokratîkî ganî newera bêro înşakerdene û çerçeweya hîra de bêro destgirewtene.''