Komeleya Heqanê Merdiman a Kurdîstanî (KMMK) raporê êlule yê binpaykerdişanê heqan eşkera kerd

KMMKyî da zanayene ke êlule rejîmê Rojhelatê Kurdîstanî de kesêk ame dardekerdene, 3 tepişteyî bi hawayêkê şikdarî merdî , kesêk hetê hêzanê rejîmê Îranî ra ame qetilkerdene.

Goreyê raporî şaristananê Ûrmîye, Sine, Kîrmaşan, Mahabad, Xerremabad, Îlam, Hamedan û Loristan de hemwelatîyî tim yenê destbendkerdene û tepiştene. Êlule de 49 hemwelatîyî, aktîvîstî tepişîyayî û nînan ra 9 kesî erzîyayî zîndanan.

Rapor de dîya zanayene ke destbendkerde û tepişteyî maruzê îşkenceyî manenê. Rapor de ame parekerdene ke êlule de 8 kolberî ameyî qetilkerdene û 6 kolberî zî birîndar bîyî.

Kolberî û kasibkarê Rojhelatê Kurdîstanî tim raştê îşkence, hêriş û qirkerdişê rejîmê Îranî yenê.