DBP û DEM Partî pîya 8ê sibate de Amed de, bi şîarê ‘Azadîya Seba Haştîye’ mîtîngêkî do bikerê. Amadekarîyê mîtîngî dewam kenê.

Wekîlê DEM Partî Zekî Îrmezî bi rayîrê ajansê ma venga pêro kesan da ke tewrê mîtîngî bibê.

Îrmezî vist vîrî ke heyetê DEM Partî di reyî Rayber Apoyî de pêvînayîşî kerdê û vat: ‘’Nê pêvînayîşan de ame dîyene ke Birêz Ocalan seba çareserîya meseleya kurdan amade yo û samîmî yo. Goreyê pêşnîyazanê ey sey DEM Partî ma hê mîtîngan, konferansan kenê û şarî derheqê prosesî de agahdar kenê. 

Seba haştîyêka rûmetêne ganî şarî ra destek bêro girewtene. Ganî şert û mercê azadîya Birêz Ocalanî bêrê caardene ke o rolê xo bi aktîfî bîyaro ca. Seba haştîyêka rûmetêne û azadîya Birêz Ocalanî ma do Amed de 8ê sibate de, Meydanê Îstasyonî de mîtîngêkî bikerê. Ganî pêro şarê ma seba haştîyêka mende û çareserîya meseleya kurdan verê xo bido Amedî, tewrê nê mîtîngî bibo. Ganî her kes seba caardişê mîsyonê xo Amed de bibo.’’