Goreyê ajansê Sana yê hukmatê Şamî serê sibayî Îsraîlî hêrişê Meydanê Teyarayan ê Helebî kerdo û netîce de zerarêko pîl resayo ci, Meydanê Teyarayan xizmetî ra vejîyayo.

Goreyê Merkezê Çimdarîya Heqanê Merdiman ê Sûrîye teyarayanê Îsraîlî zereyê Meydanê Teyarayan û depoyêkê çekan kerdê hedef. Nêdîya zanayene ke hêriş de birîndar û kişte est ê yan nê.

Nê serranê peyênan dewleta Îsraîlî hêrişê xo yê vera hêzanê hukmatê Şamî, hêzanê Îranî û Hizbullahê Lubnanî zêdînayî. Destpêkê şerê zereyî yê Sûrîye ra heta nika bi seyan hêrişî hetê Îsraîlî ra ameyî kerdene.