Şahîda Terteleyî Dêrsimî Gulluye Polat vana: "Şahîdan ra kes nêmend. Yew bi yew dinyaya xo bedilnaye. Wa çîyê ke yenê qalkerdene, nêrê vîrakerdene. Xeylêk çî serê na herre de qewimîyayî û hema zî qewimîyenê."
Terteleyî Dêrsimî ke yew qirkerdişo tewr pîl û bigonîyê tarîxê kurdan ê serra 1937 û 1938 de ameyo kerdene yo, emsar serrgera ci ya 83. a. Goreyê hûmara fermî 16 hezarî, goreyê şahîdan zî tewr tay 70 hezar kes ameyî qetilkerdene.
Rixmo ke 83 serrî ser ra derbaz bîyê dejê şarî dewam keno û derheqê terteleyî de qet cipersayîşêk hetê dewlete ra nêame kerdene.
Şahîdê ê wextî zî mîyanê serran de yew bi yewe şîyî rehm. Nînan ra tay kesî mendî. Şahîda Terteleyî Dêrsimî Gulluye Polata 85 serre wextê qirkerdişî de 2 serre bîye. Gulluyeya ke dewa Rubayikî ya Dêrsîmî ciwîyena, qirkerdiş de pî û apê ci yenê qetilkerdene. Gulluyeye û dadîya xelisîyenê. Mêrdeyê aye Bedrî Polat ke bi nameyê ded Bego yeno naskerdene û nika 93 serre yo, o wext 9 serre bîyo û verê çimanê ey de dayîka ey, wayê û birayê ey 4 û 6 serre yenê qetilkerdene. Vanê qey Bego zî merdo û bi keyeyê ey reyde erzenê awe. Bego dima awe ra vejîyeno, ferq keno ke di engiştê ci çin ê. Dima ra xo koyan de nimneno û qirkerdişî ra xelas beno.
'Xeylêk çî qewimîyayî û hema zî qewimîyenê'
Gulluyeye wina qala ê rojan kerde: "Ez ê serran qij bîya. No semed ra zî ez qalkerdişê keyeyê xo zana. La mêrdeyê mi qirkerdiş ciwîya û yeno vîrê ey. Rojnamegerî her wext yenê keyeyê ma û raportaj viraznenê. Pîyê mi o wext serê bênderî de bi. Leşkerî erzenê serê dewe û pîyê mi reyde 25 kesî meydanê dewe de kom kenê û bi komî qetil kenê. Dayîka mi û xeylêk cinîyê bînî benê axûr kamçî kenê. Qirkerdiş de di apê mi zî ameyî qetilkerdene. Înan apê mi zî veşnayî û qetilkerdî."
Gulluyeye wina dewam kerd "Cinî, camêrd, tutî pêrûne kom kerdêne û kiştêne. Cinîyê diganeyî pîzeyê înan qelişnayîne û qetil kerdêne. Tecawuzê cinîyan kerdêne. Xeylêk kesî eştê Çemê Munzurî. Ez o wext hema tutêke qije bîya. La şîdetê ke dayîka mi zî cuya, ez pê tesîr bîya. Xeylêk çî serê na herre de qewimîyayî û hema zî qewimîyenê. Şahîdan ra kes nêmend. Yew bi yew merdî. Wa çîyê yenê qalkerdene, nêrê vîrakerdene. Çîyê ke şima gênê kamera, wa bibê arşîv. Beno ke no roportajo peyîn bo. Ma do koç bikerê û şêrê. Wa vatişê ma tîya bimanê."
