21ê adara 1992î de Şirnex û Cizîre de bi hezaran kesan xo semedê şayîya Newroze amade kerd la nê merdimî maruzê qirkerdişî mendî. Qezaya Nisêbînî ya Mêrdînî dde zî Newroze de dima ke agahîya qirkerdişî eşnawîyaye. Serekwezîrê ê çaxî Suleyman Demîrel û Wezîrê Karanê Zereyî Îsmet Sezgînî verê kamerayan de şarê Nisêbînî rê sipas kerd.

Xeberê qirkerdişî Nisêbîn de bîyî sebebê hêrsêkê pîlî. Eşkerayîyê Demîrel û Sezgînî zî bîyî sebeb ke şar vejîyo kuçeyan. 22ê adare de bi hezaran kesî semedo ke qirkerdişê Pirê Şehîdan ê Çemê Çax Çaxî şermezar bikerê kom bîyî. Girseyê şarî nê cayî de çalakîya roniştişî kerde û qirkerdiş şermezar kerd. Labelê polîsanê tirkan înan ser o fîşekî eştî û pê panzeran şîyî şarî ser.

Goreyê doneyanê fermîyan netîceya hêrişî de 16 kesî la goreyê şahîdan 21 kesî kişîyayî û tewr tay 100 kesî birîndar bîyî. Cenazayê ke aîdê di kesan bîyî û kewtbî Çemê Çax Çaxî resayî şaristanê Qamişloyî yê Rojawanî. Qirkerdişî ra dima qeza de bi rojan serebûtî qewimîyayî, bi seyan kesî ameyî destbendkerdene, tepişîyayî, maruzê îşkenceyî bîyî û seqet mendî. 

Şahîdanê qirkerdişî ra Salih Falayî qala ê rojan kerde û ard ziwan ke Newroze pê coşî derbaz bîye la roja bîne wextê zîyaretan de polîsan verê înan girewt. 

Falayî vat: ''Dima ma dest pê çalakîya roniştişî kerde. Polîsî pê panzeran ameyî ma ser. Polîsan ma rê îşkence kerd û xîret kerd ke ma vila bikerê. Xeylêk kesî seqet mendî, kişîyayî. Embaza ma estbîye, dadîya 5 domanan bîye. A neçare mende ke xo pirdî ra bierza awe. La polîsan mîyanê awe de guleyî varnayî aye ser. Dima ma seba şehîdan xeyma serweşîye akerde. Polîsan waşt ke xeyme asteng bikerê la ê zî bi nimitkî ameyî serweşîye. No qirkerdiş qetî do ma vîr a nêşoro.''

Şahîda bîne Rahîme Aksu zî vat: ''Newroze ra dima her kes şi keyeyê xo. Roja bîne ma vera qirkerdişê Cizîre vejîyayî waran. Verarê mi de dergûşê mi estbi. Rayîr de çend kesan mi rê vat 'dergûşê xo bere keye.' Heta ke ez şîya keye vengê çekan ameyî. Wexto ke ez vejîya teber mi dî ke merdimî vila benê. Înan vat Pira Şehîdan de çalakîya roniştişî esta, ez zî ver bi ê hetî şîya. Ez şîya mi qirkerdiş dî. Merdimî dîyayêne guleyan ver, panzerî şîyêne înan ser. Awe ra cenazayî ameyêne vetene.  Ma pê betanîyan şehîdê xo arê dayî. Polîsan pê panzeran eşt keyeyan ser. A roje qetî verê çimanê mi ra nêşina. Nisêbînî hem zaf ant hem zî zaf xo ver da. A roje ra nata çîyêk nêvurîyaye. Hema zî zulm dewam keno.''