Şingal de her ke şono şarê Şingalî agêreno erdê xo û warê xo. Şarê Şingalî rîyê barbarîya DAÎŞî ra neçare mendbi ke Şingal biterikno û sere de Başûrê Kurdîstanî kampanê cîyayan de bimano. Şar vengdayîşê Meclîsê Xoserîya Demokratîke yê Şingalî (MXDŞ) agêreno Şingal. Heta nika hezar keyeyî Başûrê Kurdîstanî û cayanê bînan ra agêrayî. 

Tewr peyên di rojî verê cû 30 keyeyan waşt abigêrê Şingal la PDKyî nê asteng kerdî û nêverda ke abigêrê. PDKyî keyeyan rê gef wend ke eke ê abigêrê asayîş dest nano malanê înan ser. Seba ke vera babete nêrazîbîyayîşî ameyî mojnayene asayîşê PDKyî neçare mend ke biverdo keyeyî abigêrê Şingal.

Rêxistina Çimdarîye ya Iraqî zî da zanayene ke keyeyî binê çimdarîya înan de agêrayî Şingal. Roniştoxê êzidîyan zî venga êzidîyanê ke kampanê Başûrê Kurdîstanî de manenê da ke abigêrê. Roniştoxanê dewa Dugurî ra Elyas Guroyî vat: ''Ma erdê xo de aram ê. Ma venga şarê xo, eşîra xo danê ke wa abigêrê. Şingal sey verî nîyo. Tehlukeyê hêrişî nêmend. Ma venga hukmat û dewletan zî danê ke berê xo abikerê ke şarê Şingalî wa abigêro. ''

Heman dewe ra Bişar Cirdo Mirazî zî vat: ''Şert û mercê kampan zor ê, şarê ma wa bigêro. Şingalê ma biasayîş û aram o. Çîyêk çin o ke ma tira bitersê. Başûrê Kurdîstanî de kampî rîyê vîrusê Korona ra sey zîndanî yê. Rewşa ekonomîke ya Başûre xirab a. Tîya de yewîya ma verî ra zixmêr a û biasayîşêr o.''