Hemserekê Konseya Rayberdişî ya KCKyî Cemîl Bayikî beşê diyînî yê bernameyê taybetî yê Stêrkî TVyî de xoverdayîşê gerîlayan ê Herêmanê Pawitişî yê Medya û hêrişê dewleta tirke yê vera Rojawan û Şingalî ercnayî.

Qiseykerdişê Bayikî ra qismêk wina yo:

''Dewleta tirke awa Firatî vera Rojawanî tim sey çekêke şuxilnena, awe birnena. Bi nê hawayî kena ke wa şar îradeyê xo teslîmê ci bikero. Xora no sûcê merdimîye yo. Eke destê aye ra biameyêne nêverdayêne ke kurdî hewa zî bigêrê. Ganî vera na rewşe tewir bêro mojnayene. Dewleta tirke xoza herimnena û zerar dana gandaran. Ê xo rê vanê misilman la eleqeyê înan pê Îslamî çin o. Birnayîşê awe yeno manaya şantaj û gefî. Semedo ke awe birîyena heywanî mirenê, nebatî mirenê, xoza xeripîyena. Dewleta tirke cuye visnena binê tehlukeyî. Ganî hêzê mîyanneteweyî û hêzê herêmî hesabê ney bipersê.

Şingal de Hewlêr, Iraq pê destekê tay dewletanê Yewîyan ê Neteweyîyan îtîfaq kerd. Şarê êzidîyan nê îtîfaqî qebul nêkeno. Iraq û Hewlêrî wextê hêrişanê DAÎŞî de êzidîyî war verdayî remayî. La nika bê îradeyê êzidîyan peymane virazenê. DAÎŞî Şingal de qirkerdiş kerd. Semedo ke gerîlayan û şerwananê Rojawanî êzidîyî pawitî şingalijî ewro Rayber apo û PKKyî ra hes kenê. Iraq û Hewlêr pê zorî xo êzidîyan rê danê qebulkerdene la êzidîyî reyna zî înan  qebul nêkenê. Êzidîyî wazenê xo bi xo bipawê. No zî heqê înan o meşrû yo. Gereka Iraq, Hewlêr, Amerîka û Neteweyê Yewbîyayeyî nê waştişan û xoserîya Şingalî qebul bikerê. Tay kesî vanê 'PKK nêverdeno êzidîyî abigêrê Şingalî' no xapînayîşêko pîl o. Êyê ke şingalijî xelisnayî çira wa vajê 'mêrê'? Şingalijî wazenê abigêrê, semedê net têkoşîn kerd. Ma venga şarê êzidîyann danê ke wa abigêrê Şingalî û xoserîya Şingalî biwazê. Eke ewro şingalijî naye nêkerê siba do hînî nêeşkê bikerê û fermanan ra bixelisê. 

Hemleya ma ya 'Wextê Azadîye' vera faşîzmî, îşxalî û tecrîdî dîyaye destpêkerdene û ewro na hemle zaf aver şîye, xeylêk netîceyî vistî destî. Senî ke ma dest pê na hemle kerd dewleta tirke zî tecrîd kerd giranêr, vera gerîlayan operasyonî dayî destpêkerdene, vera HDPyî operasyonî kerdî û xeylêk sîyasetmedarî tepiştî. Tewr peyên dewlete Zap, Metîna û Avaşîn de hêrişê pîlî dayî destpêkerdene. Erdogan bi hawayêkê eşkerayî vano 'ma do Qendîl birijnê.' Ê seba çinkerdişê PKKyî û qirkerdişê kurdan pêro îmkananê xo xebitnenê, çekê kîmyewî şuxilnenê. Tirkîya de hetê nîjadperest-faşîstî hetkarîya Erdoganî kenê coka nê hêrişî yenê kerdene. Senî ke ê hetkarîya Erdoganî kenê gereka hêzê demokrasî, azadî, sosyalîst, şarê herême, kurdî, dostê kurdî û PKKyî zî hetkarîya gerîlayan bikerê. Vera tecrîd, faşîzm û îşxalî vinderê. Şerê vera Metîna, Zap û Avaşînî têna vera PKKyî nîyo şerê  kurdan, şerêko neteweyî yo. Ma wazenê kurdan reyde pîya vera nê hêrişan vinderê, erdê xo bipawê. Nê hêrişî vera merdimîye  û hêzanê demokrasî û azadîye yê. Coka wa her kes wezîfeyê xo bîyaro ca. Nika ma eşkenê armancanê hemleya xo ser bivisnê; tecrîd bişiknê, faşîzm birijnê û îşxalî biqedînê. Eke wina bo kurdî û şarê herême do nefes bigêrê. 

Ez selam dana xoverdayîşanê zîndanan, Kampa Lavrio û Mexmûrî. Çalakîya grevê vêşanîye ke nê cayan de yena kerdene manaya ci pîl a û têkoşînê PKKyî temsîl kena. PKK û kurdî binê şert û mercanê giranan de tim têkoşîn kenê, bedelanê giranan danê, seba merdimîye erjan afernenê. Zîndanan têkoşînê ma ard ca û vera tecrîdî vindertî. Şarê ma yê Mexmûrî îradeyê Botanî temsîl kenê ke qetî milê xo nêard war. Mexmûr zî sey zîndanan çêrîya kurdan, PKKyî temsîl keno. Êyê ke Lavrio de yê rîyê dewleta tirke ra şîyî la uca de zî çalakîyan kenê.

Dewletanê modernîteya kapîtalîste AKP-MHP ard îqtîdar. Ê xo rê vanê 'ma mîllî û herêmî (yerlî) yê' Qet yew eleqeyê înan pê nê mefhûman çin o. AKP-MHP pê destekê hêzanê modernîteya kapîtalîste vera hêzanê sosyalîst, demokrasî û azadîye şerêkê pîlî kenê. Vera PKK, kurdan şerêkê pîlî kenê. PKKyî pê têkoşînê xo no îqtîdar qels kerd. Bidenî 23ê nîsane de pê telefonî Erdoganî reyde qisey kerd û seba qirkerdişê kurdan û tasfîyeya PKKyî destûr da dewleta tirke. Telefonî ra dima hêrişanê vera Zap, Metîna û Avaşînî dest pêkerd. A roje Bidenî Qirkerdişê Armenîyan qebul kerd û seba qirkerdişê kurdan zî rayîr akerd. Bidenî Erdoganî ra nêvato ke 'şima qirkerdiş kerd hesabê ci bidê.' Qebulkerdişê qirkerdişî yê înan yeno manaya 'dewleta tirke de potansîyelê qirkerdişî esto. Ma no qebul kerd. Şima eşkenê kurdan zî qir bikerê.'

Armancê hêrişanê vera Zap, Metîna û Avaşînî qirkerdişê kurdan û tasfîyeya PKKyî yê. Peyê nê armancan de hêzê modernîteya kapîtalîste estê. Mabênê Tirkîya-Amerîka, Tirkîya-Îngilîstan, Tirkîya-Fransa, Tirkîya-Iraq, Tirkîya Swêd, Tirkîya-Hewkêr û mabênê Amerîka-Îngilîstan-Iraq û Hewlêrî de kombîyayîşê cidîyî ameyî kerdene. Dima nê hêrişan dest pêkerd. Dewleta tirke çeka kîmyewî şuxilnena la çew ci rê vengê xo nêkeno. Eşkera yo ke înan destûrê ci dayo. 

Ganî hêzê sosyalîst, azadî, demokrasî ney qebul nêkerê. Têkoşînê PKKyî seba her kesî yo. Ma venga şaranê Amerîka û Ewropa danê ke hetkarîya îqtîdarê Erdogan-Bahçelî mekerê. Wayîrê PKK, kurdan vejîyê. 

Ez Roşanê Remezanî yê misilmanan fîraz kena û wazena hînî alemê misilman û Îslamî îqtîdarê Erdogan û Bahçelîyî ra bixelisê. Erdogan pê îstîsmarê Îslamî qirkerdişan keno. Ez vengê misilmanan dana ke wa zulm, qirkerdiş û tarîtîye qebul nêkerê. Erdogan Îslamî herimneno. Kurdî zî zaf misilman ê. Goreyê Îslamî têkoşîn kenê, vera zulmî vejîyenê. ''